Sóz gúlalın gúllendirgen shayırsań (Ájiniyazov)
Xabarım bolsa da uyqas jaǵınan,
Eger keler bolsam sózdiń haǵınan,
Tunǵısh ret ádebiyat baǵınan,
Gúl uslatıp ilham bergen shayırsań.
Sizden soń tanıdım «Tallı jaǵıstı»,
Biraq, «baslı japsaq» sizden juǵıstı,
Ámiwdárya suwın, asaw aǵıstı,
Qosıǵıńa qarıstırǵan shayırsań.
Júrmeseń de óńmenińdi kóterip,
Júrgen menen «tumawratıp, jótelip»,
Qızdıń, gúldiń atın aytsa pát enip,
Qulınday qáddine kelgen shayırsań.
Sıy dizimde, xat izinde tursań da,
Boy sıylanbay, ton sıylandı ortańda,
Sonda hám ne júyrikler qaldı arqańda,
Dawan dábdebesiz utqan shayırsań.
Muxabatta aytpay ketken sóziń az,
Jasıń-gúzek, janıń-báhár, kewliń-jaz,
Sóz súylinin saylap ilgen alǵır baz,
Jez qanatın jelpip ushqan shayırsań.
Qas tulparda sın joq kózge túskendey,
Lirań baǵman qız qolında óskendey,
Shaxamanlı sheber usta pishkendey,
Poeziyagrad salǵan shayırsań.
Gúldiń shańın qaqtıń gúbelek bolıp,
Qızdıń kóziń súrttiń shúberek bolıp,
Túrki tilles tamam dógerek bolıp,
Tórt tárepke teń tanılǵan shayırsań.
Isten qaytsań gazonlardı jaǵalap,
Aylanıshtan júrdiń bulvar jaǵalap,
Izińnen juwırsaq: - toqta-a, aǵalap,
Alańlap artıńa baqqan shayırsań.
Men tikkeley aytqan joqpan mınanı,
Muxabbattı maqtap, tapsań gúnanı,
Zaya bolmasın hesh milligrammı,
Mısqaldı mıń bólip tartqan shayırsań.
Ashıqlardıń júrgen jerin tazalap,
Tabanına juqqan shańdı jazalap,
Gúlbáhárge gúl artınan sıǵalap,
Kewli gúl-gúl dónip turǵan shayırsań.
Jańa zaman jaslarına gúl berip,
Ushırasıwǵa burın kelip úlgerip,
Keshikse de «Gúlnara»ǵa gúl berip,
Qızdı, gúldi qástergelen shayırsań.
Keltirip sózlerdiń gúlin-gúline,
Bir óziń túsindiń gúldiń tiline,
Pegas minip poeziya eline,
Sátli kúni sapar shekken shayırsań.
Muxabbat bul ashıqlardıń uranı,
Qosıqlarıń - muxabbattıń Quranı,
Lirikada shayırlardıń qıranı,
Asqar shıńda sharıqlaǵan shayırsań.
Gúldiń nálin, qızdıń kewlin ósirip,
Juldızdı elitip jerge túsirip,
Sózdi ıshqı tandırında pisirip,
Sóz gúlalın gúllendirgen shayırsań.
«Miynet etken maqsetine jetedi»,
Qızıl qumǵa qızıl gúller pitedi,
«Qızlar-gúller» qosıǵıńdı kútedi,
Mıń muqamǵa túrlendirgen shayırsań.
Miynetke shaqırdıń Shamurat bolıp,
Jawǵa shaptıń «Tóbel torı» at bolıp,
Sóziń ashıqlarǵa qálem-xat bolıp,
«Muxabbat ustavın» jazǵan shayırsań.
«Kók emen»ge kóterildiń qus bolıp,
Íǵbalıńa Raysaǵa dus bolıp,
Qosıǵıńda kórgen emes qıs bolıp,
Íssı máwsim ıshqısında sayılsań.
Sóziń shiyrin qawınınday Shabbazdıń,
«Gúl ashıǵı» - Bayniyaz dep kóp jazdıń,
Xoja Hafız, Hajıniyaz, Abbazdıń,
Bázimine bash bere alǵan shayırsań.
Tórt qatarǵa tórt dáwirdi sıydırıp,
Ne bir «quwsırıqtan» óttiń qıydırıp,
Qosıǵıńa «qara qalpaq» kiydirip,
Erkinliktiń ruwxın bergen shayırsań.
Hámel, ataq, aqsha menen sanaspay,
Jalǵan abıray, marapatqa janaspay,
«Apam ketti, men qaldım» dep talaspay,
Begligińdi buzbay ótken shayırsań.
«Bozjap»tıń nartları nárwan bolıp tur,
Shayırlıq bir ájep dáwran bolıp tur,
Maǵan sendey bolıw árman bolıp tur,
Ustazlıq parızın ótken shayırsań.
Shayır ushın qalsın júz jas az bolıp,
Janıń jadırasın báhár, jaz bolıp,
Máńgige qal shayır Bayniyaz bolıp,
Shayırlıq gúltajın taqqan shayırsań.
Gúldi maqtaǵanǵa nege kúledi,
Gúl qádirin gúl ósirgen biledi,
Aytsa da «atadan altı ul edi»,
Watanıńa ornıń bólek shayırsań.