Séng-gĭng/Mā-tái Hók Ĭng/8
8:1Ià-Sŭ â săng, cêng sâ̤ nè̤ng gṳ̆ng Ĭ.
8:2Ô lā gŭ-lō̤ lì bái Ĭ, gōng, Ciō nâ kīng, cêu â̤ sāi nguāi táh-gáik.
8:3Ià-Sŭ chiŏng chīu muŏ ĭ, gōng, Nguāi kīng; nṳ̄ â̤ táh-gáik. Ĭ lâi lĭk-káik cêu táh-gáik.
8:4Ià-Sŭ gâe̤ng ĭ gōng, Diŏh sá̤-nê, ciā dâi mŏ̤h gâe̤ng nè̤ng gōng, nâ kó̤ ké̤ṳk ciĕ-sĭ ngiêng, ciéu Mó̤-sa̤ gì mêng hióng lâ̤ā-ŭk, ī-dé cé̤ṳng-nè̤ng ô bìng-gé̤ṳ.
8:5Ià-Sŭ diē Giá-báik-nùng sì-hâiu, ô lā bā-cūng lì giù Ĭ,
8:6gōng, Ciō à, nguāi nù-chài huâng hŭng-niōng gì bâng, dō̤ diŏh chió lā̤ cêng kék-kŭi.
8:7Ià-Sŭ gâe̤ng ĭ gōng, Nguāi dăng kó̤ muŏk ĭ.
8:8Bā-cūng éng gōng, Ciō gáu nguāi siá-â, nguāi mò̤-gāng-dŏng: nâ giù Ciō huák siŏh guó uâ, nguāi nù-chài dék-dék â̤ hō̤.
8:9Ĭng nguāi gì guòng-báng nguòng sê sṳ̆k diŏh bĕk-nè̤ng, iâ ô bĭng sṳ̆k nguāi guāng â: giéu cī siŏh ciáh kó̤, ĭ cêu lì; hŭng-hó nguāi nù-chài có̤ ciā dâi, ĭ cêu có̤.
8:10Ià-Sŭ tiăng-giéng ciā uâ, gì-dĕk ĭ, cêu gâe̤ng gṳ̆ng gì nè̤ng gōng, Nguāi sĭk câi gâe̤ng nṳ̄ gōng, Ī-sáik-liĕk gì nè̤ng dṳ̆ng-găng, Nguāi nuôi káng-giéng ô nè̤ng cī muāng chĭng séng.
8:11Nguāi cái gâe̤ng nṳ̄ gōng, Cê̤ṳ dĕ̤ng cê̤ṳ să̤, buóh ô cêng sâ̤ nè̤ng lì gâe̤ng Ā-báik-lăk-hāng, Ī-sák, Ngā-káuk, cà̤ sô̤i lŏ̤h tiĕng-guók siông sĭk:
8:12Nâ ciā guók gì báh-sáng, buóh dṳ̆k chók gáu ngiê-dāu háik-áng gì ôi-ché̤ṳ: diŏh hū-uái, dék-dék tiè-mà chiék-chī.
8:13Ià-Sŭ gâe̤ng bā-cūng gōng, Nṳ̄ muōng kó̤ , ciéu nṳ̄ gì séng, â̤ siàng ké̤ṳk nṳ̄. Ĭ nù-chài cék-káik cêu hō̤ kó̤.
8:14Ià-Sŭ kó̤ Bī-dáik chió lā̤, káng-giéng Bī-dáik gì diōng-nā̤ huák iĕk gì bâng, dō̤ diŏh mìng-chòng lā̤.
8:15Ià-Sŭ muŏ ĭ chiū, iĕk bâng cêu tó̤i; ciā cṳ̆-niòng-nè̤ng cêu kī lì, sê̤ṳ-hâiu Ĭ.
8:16Gáu tiĕng buóh áng, nè̤ng iĕu ô sâ̤ huâng diŏh gūi gì lì giéng Ià-Sŭ: Ià-Sŭ nâ huák siŏh guó uâ dṳ̆k gūi, bô ô bâng-nè̤ng dŭ tá̤ ĭ muŏk:
8:17cêu sê éng-ngiêng siĕng-dĭ Ī-suói-ā gì uâ, gōng, Ĭ dŏng nguāi nè̤ng gì kū, dăng nguāi nè̤ng gì bâng.
8:18Ià-Sŭ giéng dīng sâ̤ nè̤ng ùi diŏh buōng-sĭng, cêu giéu muòng-sĕng cà̤ dô guó hṳ̄ bĕng-ngiâng.
8:19Ô lā tĕ̤k-cṳ̆-nè̤ng lì gâe̤ng Ià-Sŭ gōng, Sĭng-săng à, ng lâung Nṳ̄ kó̤ diê ôi-ché̤ṳ, nguāi buóh gṳ̆ng Nṳ̄.
8:20Ià-Sŭ gōng, Hù-lì ô hiĕk, cēu-ciáh ô càu; nâ Ìng-Cṳ̄ mò̤ chă̤ sĭng gì ôi-ché̤ṳ.
8:21Bô siŏh ciáh muòng-sĕng gōng, Ciō à , ṳ̀ng nguāi sĕng diōng kó̤ muài-cáung nguāi nòng-mâ.
8:22Ià-Sŭ gōng, Nṳ̄ diŏh gṳ̆ng Nguāi; câi ĭ sī-nè̤ng muài-cáung ĭ gì sī-nè̤ng.
8:23Ià-Sŭ cêu siông sùng, muòng-sĕng gṳ̆ng Ĭ.
8:24Huók-iòng-găng hāi lā̤ guòng-hŭng guâi kī, lâung dáu guó sùng: Ià-Sŭ lā̤-káung.
8:25Muòng-sĕng lì giéu Ĭ chĭng-chāng gōng; Ciō à géu nguāi; nguāi buóh sī lò̤.
8:26Ià-Sŭ gōng, Siēu séng gì nè̤ng ciŏng-gì cī-muāng giăng nĭ? Cêu kī lì hák hŭng gâe̤ng hāi; cék-káik duâi bàng-cêng kó̤.
8:27Cé̤ṳng-nè̤ng duâi gì-dĕk gong, Ĭ sê miéh-nó̤h nè̤ng ní? hŭng gâe̤ng hāi dŭ bìng Ĭ à!
8:28Ià-Sŭ gé-iòng dô guó hṳ̄ bĕng ngiâng, gáu Gáik-gáik-să dê-huŏng dê-huŏng, ngê̤ṳ diŏh ô lâng gā nè̤ng huâng diŏh gūi, iù muó lā̤ chók lì, dīng hṳ̆ng, nè̤ng dŭ mò̤ gāng guó ciā diô.
8:29Ciā huâng gūi gì nè̤ng cêu gáe̤ gōng, Siông-Dá̤ Cṳ̄, Ià-Sŭ , nguāi gâe̤ng Nṳ̄ miéh-nó̤h găng-guó? sì-hâiu muôi gáu Nṳ̄ sĕng lì sāi nguāi sêu kū mŏ̤?
8:30Liê hṳ̄-huông ô siŏh dêng dṳ̆ ciáng lā̤ siăh.
8:31Gūi cêu giù gōng, Nṳ̄ nâ buóh dṳ̆k nguāi, cêu ṳ̀ng nguāi diē kó̤ dṳ̆-gùng.
8:32Ià-Sŭ gōng, Kó̤. Gūi cêu liê ciā nè̤ng, diē kó̤ dṳ̆ lā̤: siŏh gùng-dêng gì dṳ̆ huók-iòng pàu lŏ̤h săng-pŏ̤, tiéu hāi lā̤, ké̤ṳk cūi céng sī.
8:33Iōng dṳ̆ gì nè̤ng cāu dâi, lièng ciā nè̤ng huâng diŏh gūi gì cìng-iù, dŭ gōng ké̤ṳk nè̤ng tiăng tiăng.
8:34Gó-chṳ̄ tŭng siàng gì nè̤ng, dŭ chók lì giéng Ià-Sŭ : giù Ĭ liê ciā dê-huŏng.
| Information about this edition | |
|---|---|
| Contributor(s): | DaveZ123 |
| Level of progress: | 
|