Séng-gĭng/Mā-tái Hók Ĭng/7

^7:1Mŏ̤h ngiê-lâung nè̤ng, cêu â̤ miēng-dék ké̤ṳk nè̤ng ngiê-lâung.
^7:2Ĭng nṳ̄ ngiê-lâung nè̤ng săng-niŏh-iông nè̤ng iâ dék-dék ciŏng-uâng ngiê-lâung nṳ̄: nṳ̄ liông nè̤ng săng-niŏh-iông, nè̤ng iâ ciŏng-uâng liông nṳ̄.
^7:3Nṳ̄ hiăng-diê mĕk-ciŭ ô sá̤-chāu, nṳ̄ cêu â̤ káng-giéng, nâ nṳ̄ cê-gă mĕk-ciŭ ô duâi chà, bô ng giéng-gáe̤k, ciŏng-gì nĭ?
^7:4Nṳ̄ dĕ̤ng-nē̤ â̤ gâe̤ng hiăng-diê gōng, Nṳ̄ mĕk-ciŭ lā̤ sá̤-chāu, dīng nguāi tá̤ nṳ̄ bĕk kó̤; nâ nṳ̄ cê-gă mĕk-ciŭ ô duâi chà?
^7:5Gā-hō̤ gì nè̤ng à, diŏh sĕng bĕk kó̤ cê-gă mĕk-ciŭ lā̤ duâi chàl ciáh â̤ mìng-mìng káng-gieng bĕk nṳ̄ hiăng-diê mĕk-ciŭ lā̤ sá̤ chāu.
^7:6Táh-gáik gì nó̤h mŏ̤h liŭ ké̤ṳk kēng, dĭng-ciŏ mŏ̤h liŭ ké̤ṳk dṳ̆, giăng ĭ kă dăk ciā nó̤h, huòi-diōng-sĭng gá nṳ̄.
^7:7Giù, cêu dék-dék ké̤ṳk nṳ̄; sìng, cêu dék-dék ngê̤ṳ diŏh; páh muòng, cêu dék-dék tá̤ nṳ̄ kŭi:
^7:8huàng nè̤ng ô giù cêu â̤ dáik; ô sìng cêu â̤ ngê̤ṳ diŏh, ô páh muòng cêu tá̤ ĭ kŭi.
^7:9Nṳ̄ dṳ̆ng-găng diê-nè̤ng ô giāng tō̤ biāng, kīng niĕng siŏh-tàu ké̤ṳk ĭ;
^7:10hĕ̤k tō̤ ngṳ̀, kīng niĕng lâu-siè ké̤ṳk ĭ nĭ?
^7:11Nṳ̄-gáuk-nè̤ng chŭi-iòng muōng ngài, dŭ hiēu-dék niĕng hō̤-nó̤h ké̤ṳk giāng, cêu nṳ̄ gì Tiĕng-Hô, ng gáing-gáing ciŏng hō̤ nó̤h sé̤ṳ ké̤ṳk giù Ĭ gì nè̤ng mŏ̤?
^7:12Gó-chṳ̄ nṳ̄ huàng-sê̤ṳ ó̤i nè̤ng ciŏng-iông káng-dâi nṳ̄, nṳ̄ iâ diŏh ciŏng-uâng káng-dâi nè̤ng: ĭng lŭk-liê gâe̤ng siĕng-dĭ gì cṳ̆ dŭ sê ciŏng-uâng gōng.
^7:13Nṳ̄ diŏh diē ciā cáh-muòng: ĭng-ôi īng gáu miĕk-uòng, ciā muòng kuák, diô kuăng, ô sâ̤ nè̤ng diē kó̤.
^7:14Nâ īng gáu īng-sĕng, ciā muòng cáh, diô sá̤, ciēu dék nè̤ng ngê̤ṳ diŏh.
^7:15Diŏh sá̤-nê huòng-bê ciā gā siĕng-dĭ, ĭ chĭng-gê̤ṳng nṳ̄, nguôi-miêng chiông mièng-iòng, nô̤i-sĭng sĭk sê chài-lòng.
^7:16Nṳ̄ nâ sāi káng ĭ gík guō, cêu â̤ báik ĭ. Chié-chāu lā̤, dĕ̤ng-nē̤ ô buò-dò̤ diáh nĭ? Cĭk-là̤ lā̤, dĕ̤ng-nē̤ ô ù-huă-guō diáh nĭ?
^7:17Ŏ̤h-ciŏng-uâng huàng hō̤ chéu gík hō̤ guō; ngài chéu giék ngài guō.
^7:18Hō̤ chéu mâ̤ giék ngài guō, ngài chéu mâ̤ giék hō̤ guō.
^7:19Huàng chéu ng giék hō̤ guō, cêu chó̤i lŏ̤h lì siĕu huōi.
^7:20Gó-chṳ̄ ĭng ĭ sū giék gì guō, nṳ̄ â̤ báik ĭ.
^7:21Huàng nè̤ng chĭng Nguāi, Ciō à, Ciō à, ciā nè̤ng muôi dék-dék dŭ â̤ diē tiĕng-guók; nâ ô bìng Nguāi Tiĕng-Hô gì cī-é, cêu â̤ diē kó̤.
^7:22Dŏng ciā nĭk ô sâ̤ nè̤ng buóh gâe̤ng Nguāi gōng, Ciō à, Ciō à, nguāi nò̤-nó̤h ng sê táuk Nṳ̄ gì miàng diòng gáu, táuk Nṳ̄ gì miàng dṳ̆k gūi, táuk Nṳ̄ gì miàng có̤ ô sâ̤ cài-nèng gì dâi mò̤?
^7:23Nguāi cêu mìng-mìng gâe̤ng ì gōng, Nguāi dŭ muôi báik nṳ̄: nṳ̄ hèng áuk gì nè̤ng, diŏh liê Nguāi kó̤.
^7:24Huàng tiăng Nguāi gì uâ, cêu bìng ciŏng-uâng kó̤ có̤, ĭ kō̤-bī sê ó̤h gì nè̤ng, kī chió lŏ̤h duâi siŏh méng-siông:
^7:25ṳ̄ dâung, cūi làu, hŭng chuŏi, páh ciā chió; mâ̤ dō̤: ĭng dê-gĭ diŏh duâi siŏh méng-siông.
^7:26Huàng tiăng Nguāi gì uâ, ng bìng ciŏng-uâng kó̤ có̤ , ĭ kō̤-bī sê ngâung gì nè̤ng, kī chió lŏ̤h săi-dê méng-siông:
^7:27ṳ̄ dâung, cūi làu, hŭng chuŏi, páh ciā chió; cêu dō̤ kó̤ : ciā dō̤ sê duâi.
^7:28Ià-Sŭ ciā uâ gōng uòng, cé̤ṳng-nè̤ng gì-dĕk Ĭ gá-hóng:
^7:29ĭng Ĭ gá nè̤ng chiông ô guòng-báng, ng chiông ciā tĕ̤k-cṳ̆-nè̤ng.

Sèng 1 ciŏng · Â 1 ciŏng · Diōng kó̤ «Mā-tái Hók Ĭng» mŭk-liŏh

Information about this edition
Edition:
Source:
Contributor(s):	User:DaveZ123
Level of progress:
Notes:
Proofreaders: