Qumlar menen gúller (Qayıpnazarov)
Erke Ámiw jaǵasında,
Jawdırasıp ósti gúller,
Sarı qumlar arasında,
Sahra boylap esti jeller.
Alıp keldi qum tozańın,
Tınısh ósken gúl ústine.
Tarttı sóytip sum azabın,
Shaqasına zil tústi de.
Qum topıldı kóz ashtırmay,
Ala burqan shańǵıt úyip,
Gúl júzine kir juqtırmay,
Jer kóterip turdı biyik.
Kúshin jıynap top-top bolıp,
Jaya tústi japıraqtı,
Xám ashıldı shoq-shoq bolıp,
Qaplap ketti átiraptı.
Samal qumdı kótermelep,
Ushıradı órden-ıqqa,
Páseńlese iytermelep,
Súyreydi gúl dóngen jaqqa.
Aypap-jaypap sının buzıp,
Shań shashadı gires-gires.
Gúllerdiń de jonı qızıp,
Qaytpay qarsı ashtı gúres.
Gúl gúresin quwatlaydı,
Aqbas tolqın Ámiwdegi,
Náwpir suwı quwratpaydı,
Jarasıqtı ómirdegi.
Aptap ursa ottay qarıp,
Shámen janıp kúl bolsın dep,
Baǵ esedi búrtik jarıp,
Jáhán tolı gúl bolsın dep.
Espe qumlar tursa borap,
Suw sebedi dárya tasıp.
Ekpe gúller aldın orap,
Kógeredi ústin basıp.
Quwrataman kók giyanı,
Dep kósilip qum jatadı.
Jaynataman dep dúnyanı,
Xár ǵumsha bir gúl atadı.
Uyıtqıp ósken samal tınıp,
Basıladı qum úrgini,
Ala shańnıń saqtı sınıp,
Ashıladı baǵdıń gúli.
Hádden asıp kópke deyin,
Gúlzarlıqtı kelgen búrip,
Qaytaradı qumdı keyin,
Úydin úzigindey túrip.
Páti qaytıp páseydi jel,
Shegindi qum kúshi jetpey,
Júzi jaynap eseydi gúl,
Shań-tozańdı pisent etpey.
Ústem boldı batır gúller,
Xám tazarttı say-salanı.
Erkin ósip atır gúller,
Bezep sheksiz keń dalanı.
Ózin eriksiz jel ushırıp,
Qańǵıp kelgen bir qıyadan,
Hálin bilmey qarsı turıp,
Qum jeńildi kók giyadan.
Narday shógip jattı jasıp,
Juwasıttı kóp qumshıqtı.
Áste-áste iynin basıp,
Tóbesine shoq gúl shıqtı.