Paxta tergen qız (Qayıpnazarov)
Tań sáhárden kelip atız ishine,
Talwas etip kirisip óz isine,
Kıza-qıza minip pátli kúshine,
Is pátin kúsheytip paxta tergen qız.
Palwanlarsha aq bilegin sıbanıp,
Ayanbastan iske ǵayratın salıp,
Miynet penen ósken gúlge oranıp,
Kolxoz dalasında paxta tergen qız.
Denesinde jiger ǵayratı qaynap,
Bileginde bulshıq eti bultıldap,
Mashinaday qolı shaqqan qıymıldap,
Eki qollap hasıl paxta tergen qız.
Peshe etip miynetke taq turıwdı,
Úlgili is-islep alda bolıwdı,
Miynetinen mol zúráát alıwdı,
Bas wazıypa etip paxta tergen qız.
Iskerligin kersetip is júzinde,
Is qızdırıp paxta atız ishinde,
Pátine pát qosıp hárbir kúninde,
Bir júz jetpis kilo paxta tergen qız.
Kózim túsip kúlimlegen kózińe,
Júzim tústi kuwanıshlı júzińe,
Xálge kuwat harmasınım ózińe,
Taǵı da is qızdır paxta tergen qız.