Pauve kimére

From Wikisource
Jump to navigation Jump to search
Joyeux rèspleus  (1899)  by Jean Bury
Pauve Kimére
[ 16 ]
Pauve Kimére

AIR : Sous l’amandier ou Es meus de fleurs

1

Ine sîse d’hiviér, divins n’cwahante frudeure,
Ine pauve bâcelle ploréve à l’coène d’on boès.
Sins s’apparçur qu’elle lèyîve gotter l’heure,
Li moért è l’âme, elle dihéve d’ine flâwe voèx :
L’amour trompâve a gâté m’destinêye
Et Dièw m’a r’prit l’èfant qu’èn èsteut l’frut.
Ji n’rigrette nin li calin qu’m’aband’nêye :
Ji pleure l’èfant (Bis)
Ji n’rigrette nin li calin qu’m’aband’nêye,
Ji pleure l’èfant, rindez-m’èl don, mon Diu !

2

 
L’amadonleu qui m’aveut juré s’véye
Et fait l’sièrmint di m’kidûre à l’âté
M’a lèyî là po sûre ine aute jône fèye,
Pasqu’elle aveut bin l’tour di s’gây’loter.
Tote seule èco ji m’ritrovéve so l’térre,
Avou l’pauve ange qui ji d’véve piède ossu.
Li cour moudri, sins comprinde ci mystére,
Ji pleure l’èfant (bis)
Li cour moudri, sins comprinde ci mystère,
Ji pleure l’èfant, rindez-m’èl don, mon Diu !

[ 17 ]

3

Pauve orphilène sins consèyes ni caresse
D’on pére ou n’mére po m’accègnî l’dingî,
J’a st-avu l’toért di m’jetter d’vins les bresses
D’è ci qui mi-âme aveut todis songî.
J’a st’u trompêye, min mâgré cisse grande pône
S j’raveus m’fis, ji n’viqu’reus pus qu’por lu.
Qu’âreus-je bin fait, po tant soffri si jône !
Ji pleure l’èfant (bis)
Qu’âreus-je bin fait, po tant soffri si jône !
Ji pleure l’èfant, rindez-mèl don mon-Diu !

4

Min tot d’on côp li voèx dè l’pauve kimére
Div’na pus flâwe et spierda st-è grand boès.
Elle pinsa vèye dihinde l’âbion di s’mére
So n’blanke nûlêye et lî dîre ine saquoè.
Ci fourit là qu’elle jètta s’dièrainne lâme
Ca po tot fér elle ni gèmiha pus.
On r’jet dè l’leune èpoèrta rat’mint si-âme !…
Ad’lé si-èfant (bis)
On r’jet dè l’leune èpoèrta rat’mint si-âme !…
Ad’lé si-èfant, houye, elle prèye li bon Diu.