Page:Teatro - Salvatore di Giacomo.djvu/116

From Wikisource
Jump to navigation Jump to search
This page has been validated.
110
'o voto

’o ssapite ca si mo tengo nu vascio pe durmí io pavo ’a mesata cu ’e denare mieie, c’ ’o sango mio? Io mangio pane e pane pe nun cercá niente a nisciuno! Io nun aggio avuto niente ’a nisciuno, avite capito? Io nun voglio niente ’a nisciuno! Io voglio a Vito Amante.

Amalia

(furibonda, gridando)

Vuo’ a Vito, vuo’?!... ’E tu te cride ca na femmena comme a te se po’ pigliá a nu figlio ’e mamma comme a chillo?

Cristina

(ironica, fremendo)

Chesto nun ll’avarrissive dicere vuie!

Amalia

(gridando)

Vito Amante nun se sposa a na mala femmena!

Nunziata

Zi’! Zi’!...

Cristina

Mo mm’ ’o dicite n’ata vota?

Amalia

T’ ’o dico n’ata vota, sí! E si vuo’ fa buono, vattenne!