Tjondong lah patuik bapanungkek
Nak kokoh adat limbago
Bujuang pauleh nan ah singkek
Korong kampuang nak santoso.
Kutiko kami lai hiduik
Ibu bapak hutang nak lansai
Bujuang gadang umua lah tjukuik
Lah patuik djadi marapulai.
Pandang dek anak kiri kanan
Dalam kampuang nan babandja
Mudo lah samo babimbingan
Bujuang surang lai nan tingga.
Landjungan turuik kato kami
Nak panuah runggo hati mamak
Adat djo sjarak nak tadiri
Dunia nak samo djo nan banjak.
Mandanga rundiangan ajah, duo djo mamak kanduang, pajah Landjungan dek bapikia, raso tapaso manarimo, lalu mandjawabnjo sakali.
Ampun lah ajah dengan mamak
Kok itu djinih ruponjo
Aka habih paham talantak
Hambo sorang lawan baduo.
Tapi samantang pun baitu
Pangadja bapak pado hambo
Walau sapantjuang lihia putuih
Nan bana hambo sabuik djuo.
Elok dek urang kamamakai
Lamak dek urang kamamakan
Kok dek paso mukasuik sampai
Karadjo buang bajaran.
Barek njo urang kamamikua
Ringan njo urang kamandjindjing
Kalau lah lalu dek manukua
Biaso puntjo patah puntiang.
