Ajah kanduang ampuni bambo
Mandanga rundiang ajah tadi
Tagamang tubuah djo anggoto
Hambo bakabek tak djo tali.
Ajah pikiri dalam²
Tjubo lah timbang buruak baiak
Runuik lah sahabik paham
Sampaikan salam 'kakasiak.
Kok banjo tidak baitu
Awai tak sahabih raso
Talangga ruweh dari buku
Mungkin djo patuik tak tasuo.
Kalau malua dari limbago
Tasuo tijlako malang
Nan murah dimuluik sadjo
Bak kundi diateh dulang
Adok kadiri badan hambo
Akad nikah ajah sabuikkan
Balun kamungkin lai agak njo
Balun tabajia kawadjiban.
Tjubo lah ajah agak2, pikiri bana sungguah2, hambo rang ketek mudo matah, aka singkek pandapek balun, dajo usaho djauah bana, mantjari balun lai pandai, rintang manggaduh mamak djuo, ibu djo bapak nan kasusah.
Kok sampai djadi rang sumando, sabuah tidak ka urang harok, batukuak mangko kakurang, bauleh mangko kasingkek. Achia kalaknjo kamudian, arang habih basi binaso, baiak dibuek buruak tumbuah, ajah djuo nan kamalu. Lain nan dari pado itu, gala pusako kadidjudjuang, baban barek singguluang batu, kadjadi tampuak korong kampuang.
Basakik djadi pangulu
Nan murah hanjo barundiang
Kok tak pandai mangganggam hulu
Karih bamato patah puntiang.
