Page:Sutan Landjungan.pdf/7

SOPAN SANTUN HUBUNGAN BAIAK

Bagai awa pamulaijan kato

Sipatan runding pandahuluan

Salam taundjuak kapambatjo

Kaganti badjawek tangan.

PIHAK didiri badan hambo, kampuang asa Taratak

Tian, pindah kadusun Alam Leba, dibimbiang ibu djo bapak, marantau kadunia hajat. Umua tjukuik balig lah sampai, lah patuik tjanggang djo bapak, tjarai djo mandek lah walaknjo, ditjubo balajia sorang, kapulau putaran maso, kakoto edaran zaman.

Sadjak ketek mudo matah, manampuah galombang hiduik, pasai dek riak pasakitan, dipapah alun suko duko, lameh dek ombak ragam dunia, mandjadi buah pangalaman.

Ijo bana kato rang tuo

Lamo hiduik banjak dirasai

Djauah badjalan banjak diliek

Salamo marantau kadunia hajatko

Puntjak tudjuan balun tatjapai

Kabaka pulang balah lai dapek.

Salamo manampuah putaran maso, melalui edaran zaman, maso dek, ketek balun gadang, disitu hati nan lai sanang, sanan pikiran nan lai suni. Kandak bapantang tak kabuliah, nan pintak tatap balaku.

Kok elok utang mamakai

Kok lamak hutang mamakan

Malah dek ranjuak djo parangai

Babari djuo nan diangan.