Pihak dikami nan dahulu, samaso balun ba Landjungan, hambo gadang gala balipek, adiak sorang lah gadih gadang, lah patuik alua dituruik, adat djo sjarak lah badiri, soko lah patuik dibangun, gadih lah patuik badjundjuang.
Mupakat sado warih nasab, nan sapajuang sapatagak, nan salingkuang tjupak adat, mantjari bulek nak sagolek, mantjari pitjak nak salajang, alua kok alah kaditu- ruik, adat kok alah kadipakai. Lah sudah balitjak pinang, salasai batapuang batu, bulek nan tidak bapasagi, pitjak lah buliah dilajangkan. Kato saukua samo pandjang, rundiang saukua lahia batin, tuah sakato dimamakai, bahaso dunia ka diadang, sakali mangambang puro, duo tigo hutang tabajia. Tjantjang nan duo sagaragai, adat nan duo sarantjano, satu mangambang nan balipek, duo djo halek marapulai. Sabab dek dunia ka diadang, dipakai adat nan katigo, banamo balambang urek, tjantjang tindiak dikorong kampuang, halek sakato sanagari: Kok kateh tahambun djantan, kabawah tasasai bulan, himbauan sisiak palapah, dunia mangiṛokkan daun, halek manangkuik kan tjawan. Tumbuah mangatjak nan baitu, tak ameh bungka diasah, tak aia talang dipantjuang, tak bareh atah dikisiak, tak kaju djandjang dikapiang, dek bujuang dima katantu.
Didalam adat djo limbago, kalau mangatjak nan baitu, buliah mangisa sawah ladang, tampat mandjua djo manggadai, ado lah ampek tampat tumbuah di maik nan tabudjua, kaduo dirando tak balaki, katigo kampuang tak badiri, kaampek soko tak tabangun, tampat barabih nan bak kian, ijo bak andai kato bida:
Nan labiah malu djo sopan
Nan hilang dapek diganti
Bia takutjak minum makan
Asa lai panuah runggo hati.
22
