tak kundjuang bakasudahan. rintang babaliak sinan djuo. Kini lah habih aka budi, tatumbuak paham dikampang, angan baputa nak badjalan, hambo baniat nak karantau.
Itu sabab hambo kamari
Mamintak bana, pado mamak
Malah dilihek dunia rami
Paham tatutuik nak tabukak.
Mandanga rundiang nan taundjuak, kato nan dari kamanakan, nan tidak disangko², haram lilah taangan², paham Landjungan kabaitu. Pajah baliau dek bapikie, duduak tamanuang sakutiko, baru rundiang baliau djawab, bakat Datuak Andiko:
Mano lah garan ang bujuang
Kok itu nan Sutan bintjang.
Balun djadi kusuik dikampuang
Lah nak mantjinto rantau urang.
O! Bujuang pikia lah dahulu
Runuik lah paham djo nan tanang
Sadang dikampuang bujuang lai ragu
Kok kunun dirantau urang.
Kini baitu lah di bujuang, manuruik kato papatah, paitih satjaro adat, kalau kato tantu baasa, limbago hu- djan njo bapuhun. Asa usua buliah nak tantu, tjubo tjuraikan pado mamak, apoko sabab karanonjo, bamulo paham dek ragu, nan djadi mamusiang bana, sampai manjingguang nak karantau. Malah disabuik pado mamak, samo ditimbang buruak baiak, kok untuang bana mandatang, nan bak papatah djo patitih:
Asa lai undang dikuasai
Tatjitjia samo dipiliah
Bapantang kusuik tak salasai
Tak ado karuih nan tak djaniah.
Baru mandanga kato itu, dek diri Sutan Landjungan, basambuik gajuang mamak kanduang, lalu mandjawab njo sakali.
16
