kasau. Paham bak untuang anai², angan² manggiriak langik, niat nak mentjapai bulan, balun lai djadi tabang kateh sadapo ganggang dari bumi, tubuah masiak sajok maranggeh, untung digilo awang2. Sampai dikitjuah angan2, lah dilantjuang agak2, tjadiak malam lah binguang siang. Tapi samantang pun baitu, papatah tak buliah dilupokan, kato bida batamu djuo, namun bapaknjo urang asa, lalu kaanak rintiak djuo. Lorong Tunku Biopari, urang alim palito alam, suluah bendang dalam nagari, urang saba bapaham lilah. Lauik tanang lubuaknjo dalam, gaduang alemu djo bitjaro, tantu manurun ka nan ketek, bapak kuriak anaknjo rintiak, adat biaso nan bak kian. Agak lalah Sutan Landjuangan, pueh maadjun dek bapikia, pasai marunuik aka budi. Dalam dibimbang nan bak kian, sadang bamanuang duduak surang, takana waknjo dipapatah, kato hidaran tjaro Minang:
Tatumbuak biduak dikelok kan, tatumbuak kato dipikiri, pantangan adat rang putuih aso. Tak ladju dandang diaia, kagurun kito tadjak kan, tak ladju dandang digurun, kalangik kito lambuangkan. Tatumbuak paham di kampuang, angan baputa nak karantau. Nak tampak alam nan leba, nak tahu dipadang lapang, tampak maniru manuladan, untuak parubah nasib diri.
Baru tapikia nan bak kian, lalu dikana2 bana, dibao duduak djo manuang, dirunuik djo aka budi. Paham dibao kanaratjo, bakeh timbangan dalam tubuah, banamo aka djo pikiran, bungkanjo tjinto kandak bana. Sapakat lahia djo batin. sakato muluik djo hati, bulek nan tidak bapasagi, pitjak lah buliah dilajangkan, bulek lah buliah digolekkan. Pikia habih timbangan sudah, udjuik satu pangana bunta, tunggang hilang barani mati, ka Tuhan untuang disarah kan, barih karantau ditapati.
- Malang batu nak njo tinggalam
- Nasib sabuik nak njo tarapuang
- Habih pikia lah dapek paham
- Mudo manjarah pado untuang.12
