- Buliah dipandang nan basamo
- Paniliak dunia tjaro kini
- Apo ubahnjo dari nan lamo
- Balainko dari nan usalli!
- Samaso di niniak mujang
- Siarak lazim adat bapakai
- Alam suni buininjo sanang
- Koto aman kampuangnjo damai.
- Tapi kauntuak pabandingan
- Tindjau lah dunia lauik budi
- Buah pikia isi ranungan
- Ganti djugalo zaman kini.
- Hambo bintjang Sutan Landjungan
- Landjungan adat djo limbago
- Kaganti naratjo djo timbangan
- Pangganti bajang-bajang maso.
- Urang kampuang Bulakan Pikia
- Bagala Sutan Landjungan
- Dek mamak malandjuang dunia
- Sansai nan ketek manangguangkan.
Di Tandjuang Titian Aka, dalam dusun Bulakan Pikia, di Sungai Talago Paham, dikoto Ramalan Budi, ado rang budjang mudo matah, bujuang rang ketek djolong gadang, bagala Sutan Landjungan. Anak dek puti Saridunia, ajahnjo Tuanku Biopari, kamanakan Datuak Andiko, Datuak Andiko nan baradat, kampek suku dinagari, inggiran sangsoko adat.
Nan diri Sutan Landjungan, sungguah rang ketek mudo matah, dek ajah masak asuhan, mudo batundjuak baadjari, warih kaanak baturunkan. Walaupun balun satjukuiknjo, tjaro dek mudo djolong gadang, kadar paukua pandjangkokan, kaki malangkah nak djan tadorong, tangan mandjangkau nak djan talansuang, raso lah sadang baiak katjak.
Sungguah samantang pun baitu, walau kok kajo aka budi, balabiah dipaham djo bitjaro, mardeko hati ka-
