Tapi samantang pun baitu, bak kato tuanku tjako, langkah salangkah balun sampai, hambua sahambua balun tibo. Namun dek diri badan hambo, dituruik kato nan bana, dek kiro2 tak sakali dapek, nan bana tak sakali datang, walau kagawa duo kali, dek didalanı mungkin djo patuik, mati nan tak dapek diulang, hambo tjubo sakali lai. Sungguah samantang damikian, dek tuanku ansua lah mantjari, kok gawa djuo pilihan hambo, antah kok alah nan tataruah. Sudah barundiang nan baitu, baliau lah antok haniang sadjo, lah samo suni timba baliak, tuanku tidak pulo njo mandjawab. Samo maambiak kampia rokok, diguluang sabatang sorang, lah maisok kaduonjo. Salasai rokok di panggang, dihiruik sambia bamanuang, manimbuakan pikia djo pandapek, nak njo tabukak kiro2. Asok mandulang kaudaro, pariso maruang tubuah, kaniang lah karuik dek bapikia, aka mandjala hilia mudiak, budi marangkak kiri kanan. Sabanta bimbang dek bapikia, dek diri Datuak. Andiko, tabajang raso nan katudju, talinteh raso nan kaelok, sampailah lahia djadi rundiang, bakato Datuak Andiko:
Mano tuanku djanjo hambo
Pajah lah hambo mamikiri
Kahambo ulang mamiliahnjo
Kok tagamang duo kali.
Kok tibo djuo dinan salah
Pandang kok tibo dinan buruak
Duo kali pisang babuah
Tidak tamakan lai dek baruak.
Hanjo nan tampat bapegang
Papatah tuanku tjako
Bakato sapatah balun sadang
Badjalan salangkah balun tibo.
Kini baitu dek tuanku
Pandangan hambo nan sakali kini
Kok mudjua lai elok dibao lalu
Kok tidak tuanku lai mantjari.
56
