Malangkah salangkah sampai
Dalam mantjari nan tjaro iko
Walau bak mano tjadiak pandai
Itu nan djarang basuo:
Didalam garak djo takadia
Itu nan kito pikiakan
Usaho kito sakadar jahia
Batin lah sudah didjandjian.
Didunia kito manapati
Hanjo mananti kutikonjo
Tak kanai tembak nan sakali
Tjukuikkan duo dja katigo.
Lah hambo katokan pado tuan
Djan tangguang kapalang kakok
Tjubolah aliah pamandangan
Tjari nan lain nan kaelok.
Malah awai sahabih gauang
Sudah ditampi dihindangi
Manjarah kito pado untuang
Dimano takadia ditapati.
Agaklah Datuak Andiko, mandanga tuntutan dek tuanku, sampik tak dapek batinggang, lapang baralah tak saleso, nan baban wadjib didjudjuang. Walau bak mano kasulitan, namun untuak ditariak djuo, batambah malu mailakkan. Dalam bapikia nan bak itu, miki bak mano kadjadinjo, diulang pulo la mamiliah, lalu mandjawab njo sakali:
Kalau baitu kato tuanku
Lah sendjang sagalo bedo
Manantukan rueh djo buku
Dalam alemu Tuhan kito.
Lah hambo tjubo mamiliah
Mungkia tembak kasasaran
Lahia djo batin lah salisiab
Tak dapek dipagunokan.
55
