korong kampuang. Tungku nan tiyo sadjarangan, banamo tjadik tahu pandai, dek lai kokoh bapilin tigo, lah patah runtjiang nan mantjutjuak, maro basamo manguakkan. Kini lah zaman nan kaampek, dinding timbago lah tarateh, kabek sabalik lah tabukak, hantjua bilanggu dunia barat, alam tak tadjadjah lai.
Kok tagak tidak lai tasundak, malenggang tidak lai tapampeh, duduak alah samo randah, tagak alah samo tinggi, djo tjutju Adam diduniako. Tapi sungguah pun baitu, mego di timua lah tjuatjo, tjewang dilangik lah tabantang, Tuhan nan satu sandi iman, adat djo sjarak kadipakai, seni budaja tanah aia, tampak manjimpang katjampuran, mangentjong dari nan ditudju. Djikok diliek maso kini, tidak basuluah batang pisang, lah bagalanggang mato nan banjak, lah babagai rauik rotan, tampak basilang pandakian, tatukiak djadjak mandaki, lah kandak hati nan dituruik, walau dilua kandak bana, manjimpang dari mungkin patuik, tampan tasuo kato adat:
- Kulik lah manganduang sia
- Mumuak lah sampai kapanguba
- Binaso tareh nan didalam
- Sulik tubuah bapaham tjaia
- Kok sampik alam nan leba
- Lahia batin dunia tinggalam.
- Kok sampik alam nan leba
- Sulik tubuah bapaham tjaia
- Binaso tareh nan didalam
- Mumuak lah sampai kapanguba
Dak mamandang rupo nan baitu, tapikia lah insan dalam tubuah, nak malukihkan maso nan ditampuah, zaman djo musin nan talampau, nan dapek didusun alam leba, tampak didalam padjalanan, dalam parantawan dunia hajat. Tidak nan lain tudjuannjo, bukan runtjiang kapantjutjuak, tidak panjandjuang pahantakkan, sakiro gambaran maso, sakadar lukisan zaman. Kok untuang buliah paguno, djadi taratjo dek pandapek, ganti datjiang dek buah pikia, paniliak barih nan tasuriah, pangati achlak budi, panimbang bajang-bajang maso, edaran zaman tanah aia.
