Tapi dek urang lah baumua, lah babagai nan ditjubo, lah bamatjam nan dirasai, digumam sadjo pahik manih, djadi pidoman maso datang. Dalam bamanuang nan baitu, sabanta antok haniang sadjo, sorang tidak nan barundiang, tasintak Datuak Andiko, datang bana timbua pikiran, lalu bakato njo sakali:
Mano Tuanku Biopari
Bamimpi hambo sadang djago
Kudian baru disadari
Kurang paham tarabo².
Dek pandang kiro dinan tampak
Dek lihek mato awak lah harok
Tadajo hati dinan rantjak
Tidak dikadji buruak elok.
Untuang lai dalam musjawarat
Lai rundiang kito baduo
Kok tidak tantu kamularat
Kalau pandapek sorang sadjo.
Kok dimuko diri Landjungan
Dalam kulik lah tampak isi
Duo kali dangkek kasubarangan
Mamak tak barago lai.
Tjobo kito batimbang katjak
Antaro mamak djo bapo
Lah mung ka pandapek mamak
Lahiakan pulo pandang baɲo.
Mandanga rundiang nan bak kian, pangakuan Datuak Andiko, galak tuanku dalam hati, lah maraso budi dangkek, pajah tuanku dek batinggang, djadjak tatukiak nak talipua, djan djadi mamalu bana. Dek tuanku rang bidjaksano, tahu diratak kamamatjah, nak djan mandjadi lilik sumbiang, disimpan djo muluik manih, dililik djo rundiang elok, bakato Tuanku Biopari:
O! tuan Datuak Andiko
Tuan nan tidak hambo upek
Pangana tak sakali tibo
Bana tu tak sakali dapek.
54
