Page:Sinfonie d'amore.pdf/92

From Wikisource
Jump to navigation Jump to search
This page has been validated.



Quanta vote, tremmanno ’e sta pazzia,
aggio tanto penzato ’e te scurdà!
E quanta vote chest’anema mia
ha ditto all’uocchie miei: Nun ’a guardà!

Ma pe fa chesto, Core mio d’ammore,
pe nun te suspirà, pe nun patì,
n’ommo, che t’ha fissato a tutte ll’ore
nun ha da fa nient’ato: ha da murì!

Duorme! Io te metto na curona ’e rosa
ncopp’a sta fronte e a sti capille nire!
Duorme, nun penzà a me! Duorme, arreposa!
Tutt’ ’e spine ’e ttengh’io! Tutt’ ’e suspire!

Voglio sunnà cu l’uocchie apierte ancora
e albanno juorno te voglio vedè
schiudere chella vocca arrobbacora
comm’a nu sciore ncopp’a nu buchè!

E voglio cadè stanco e affaticato
nun saccio addò, pe te putè sunnà,
cchiù bella de nu sciore ch’è sguigliato,
ma cchiù crudele ’e tutt’ ’e nfamità!

— 90 —