Karano lah tibo dinan rantjak
Ka Tuanku rundiang hambo sarahkan
Tak patuik hambo mailak
Tak luluih tjatjek djo bandingan.
Kito saukua lah sasuai
Isilah kandak Sutan Kabanaran
Supajo niat nak njo sampai
Tjapek tuanku sugirokan.
Lorong Tuanku Biopari, djo diri Datuak Andiko, rundiang habih kato sasuai, bana saukua dinan elok, tando karadjo kamandjadi, kato putuih mupakat sudah.
Bahagian 5
TUNDUAK KAPAHAM KABANARAN.
Dihimbau Sutan Landjungan, lah datang tjaro sopan santun, lah tibo dimuko ajah, sarato djo maniak kanduang, duduak basimpuah njo sakali, bakato Tuanku Biopari:
Nak kanduang Sutan Landjungan, dangakan malah buah rundiang, tantangan ketjek kito tjako, antaro kami baduo, djo diri mamak kanduang bujuang, lah pasai batimbang pikia, batuka tuka pandapek, kini lah buliah nan saukua, lah timbua kato sapakat, kini ka bujuang dilahiakan.
Rundiang kami lah sabuah
Bujuang dilapeh pai badjalan
Nak suni awak mudo matah
Langkah diikek djo tunangan.
