G. P. ’s Monthly (marto) kontenas Ido for beginners, leciono da Hugon, e Angla idiotismi tradukita en Ido.
Le Collaborateur (Genève, februaro) anuncas, ke la Komitato Idista di Genève aranjas konkurso pri Ido kun monal premyi, di qua la rezultaji esos publikigata en la sama jurnalo ; e ke Ido esis adoptata da la Komercala Societo di Olten (Suiso.)
Solothurner Zeitung (13 februaro). — La L. I. e la libro-komerco : importo di la L. I. por la difuzo di la verki en omna landi. Texto en Ido e D. : Idilyo di frontiero : anekdoto pri trupo de cigani gardata sur la franca-belga frontiero da la jendarmi di la du nacioni, qui permisas enirar nula de la du landi.
Solothurner Zeitung (20 februaro) raportas pri la festa kunveno di l’Idista grupo di ta urbo. — Ol insertas en sa Internaciona angulo artiklo expozanta, segun Prof. Lorenz, la ciencala e pozitiva karaktero di la problemo di la L. I. ; pose, texto en Ido e D. : Pri nutral higieno.
Solothurner Zeitung (27 februaro) respondas a la sempra objekto : « A quo servas a me la L. I. ? Me lernos ol kande la ceteri savos olu », e montras un utileso di L. I. quale Ido : ol docas l’ internaciona vortaro, komuna posedajo di la civilizita nacioni : tale ol vicas ulagrade la konoco di la latina e greka lingui, ol preparas e faciligas la lernado di la stranjera lingui, kande ol esas necesa. — Quale on lernas la L. I. (artiklo en Ido).
National-Zeitung (Basel, 1 marto) raportas pri la kunveno di la Grupo idista en Basel, en qua So Schneeberger diskursis. Pos ta diskurso la Esperantisti prezenta adheris a l’idista grupo, qua facas kurso pri Ido.
Basler Nachrichten (1 marto) insertis en Ido-angulo anekdoto en Ido : Samariano.
Aargauischer Hausfreund (23 febr.) raportis detaloze pri la kunveno di la Suisana Uniono, eventinta en Brugg la 20 februaro, e pri la progresi di Ido en Suiso.
Templaren (18, 24 februaro, 3, 10 marto) duras publikigar lecioi pri Ido, kun exercala texti, da G. Larsson.
Agitatoren, semanal jurnalo pri abstenismo e c. (Kopenhago, 26 febr.) insertis granda artiklo da Dlo G. Mönster : La laboro di la Delegitaro-Komitato por la L. I. Ol rezumas la historyo di la Delegitaro, la labori di la Komitato en 1907, la « reformo » exekutita segun l’axiomo di So Jespersen, citas komparenda texto en Esp. e Ido (Chiuj tiuj kiuj scias tion shanghos opinion), naracas la fondo di Progreso e di l’Uniono, la konstituco di la Komitato e di l’ Akademio, e la labori di la precipua Idisti. Bonega artiklo di propagado, tre kompleta.
