Page:Progreso - 2a yaro.pdf/605

From Wikisource
Jump to navigation Jump to search
This page has been proofread.
579
PRI NIA METODO

kato, preskritar, repartisar, solventa, stagnar, transferar, varo (II, 75-77) per 9 voci.

16. On admisas ka quale segunvola vicanto di kad (II, 15), per 7 voci.

La sekretaryo,
L. Couturat.
PRI NIA METODO

Ni ne multe prizas la teoriala diserti pri la metodo sequenda en ica o ta kazo ; li semblas ofte tempoperdo, ed esas plu bona laborar, kam diskutar longe pri la metodo di laboro. Tamen, ni volas respondar a du seryo de kritiki od objekti diversa e mem kontrala. L’uni (tre malmulti) deziras la « plena libereso », ne nur di diskutado, sed di linguo : li volus, ke ni pozez itere e senfine en diskutado omna principi di nia linguo ; lia idealo esas, ke singlu uzez segun arbitrio sua propra linguo. Sed ol kontredicas l’ideo ipsa di linguo, e di linguo internaciona : nam omna linguo esas komunikilo e ligilo, e la LI. precipue devas esar una por omni, se ol devas havar ula utileso relate la vivanta lingui. La postuli di ta « liberesani » refutas do su ipsa ; nam, se on kontentigus li, on simple dissolvus e destruktus la LI.

Altri (plu multi) esas poke malquieta pro la libera diskutado, a qua nia linguo esas konstante submisata en ica revuo ; e li questionas, kande ol esos pronta e finita. Li alegas, ke esas neposibla o malfacila propagar linguo « ne fixa », expozata a « sencesa chanji ». Kredeble, ti de nia amiki qui expresas tala timi, od esas obsedata da la memoro di la Fundamento, od esas influata plu o min koncie da la klamachi di la Fundamentisti, qui audacas repetar, ke nia linguo chanjas sencese de monato ad altra, til plena nereko­no­cebleso[1]. Nia lektanti savas ya, quante esas malvera ta aserti di malsincera adversi. Nu, l’ideo di Fundamento, di seryo de formi o reguli netuchebla, esas tute kontrala a l’esenco di irga linguo, mem artificala, segun la Deklaro da Prof. Jespersen, qua esas e restas nia guidilo[2]. Nia amiki ne lasez su influesar da la superstico di la Fundamento, nek terorigesar da la spektro di la posibla chanji : nula linguo esas fixa e pronta, ne mem nia malnuva naturala lingui, do ankore min multe nia nuva artifical idiomo ; nultempe ol esos kompleta e finita ; postular ke la linguo esez fixa e pronta ante propagar ol, esas simpla kimero.

  1. Stranja fakto ! la sama personi esas kultani di la Fundamento, qua permisas, segun Dro Zamenhof, chanjar Esp. « til plena nereko­no­cebleso » !
  2. « On stonigus linguo, se on volus establisar un sola libro quale nechan­jebla normo por omni e por sempre ».