veni omna marsdio ye ok hori vespere. Ni enskribas kun plezuro ta nuva konquesto di nia linguo en Britanio, e dankas nia samideani de Birmingham.
De Januaro 1909, G.‑P.’s Monthly, qua ja editas omna-monate un pagino de lecioni pri Ido, komencos editar un pagino de Utila Informi, en Ido, pri komercal ed industrial temi extraktita de la oficiala dokumenti di guvernistaro di omna landi. To esos forsan la komenco di komercal jurnalo en Ido, se la nombro de aboni justigos extenso di la texti. Abono omna-lande, 2 fr. 50 (2 sh., 2 marki, 50 Usonala cendi) yare afrankite, che So G. Pitman, London.
Dum la monato novembro aparis :
Che Franckh : Vollständige Grammatik der Internationalen Sprache von L. de Beaufront, deutsche Ausgabe von Rob. Thomann ; germana edituro di la Kompleta Gramatiko ja france editita. (Preco : fr. 1,25, M. 1.)
Che Delagrave : Grammaire élémentaire et Exercices, da L. de Beaufront : 22 exerci gradizita pri omna parti di la gramatiko e di la vortifado, singla sequita da lexiketo korespondanta ; ye fino di la libro, alfabetala listo di omna vorti uzita referas a ta lexiketi. (Preco : fr. 1,25).
Ye komenco di decembro aparos :
Che Franckh : Elementare Grammatik und Uebungsbuch von L. de Beaufront, deutsche Ausgabe von R. Thomann : germana edituro di la precedanta verko.
Che Delagrave, Pitman e Franckh : Unesma Lektolibro, 1 tomo de 112 pagini, kontenanta mallonga e facila peci (rakonti, anekdoti) tradukita de bona autori de la precipua europana lingui (preco fr. 1,25, 1 sh. 1 mark). Balde sequos Duesma Lektolibro, kontenanta plu longa peci de plu alta literaturo (sama volumeno e sama preco).
Cirke fino di decembro aparos che Pitman Internaciona komercala Lexiko, en Angla, Franca, Germana ed internaciona lingui, kontenanta omna teknikal expresuri di la komerco e specimeni di komercala letri ; redaktita da P. D. Hugon kun helpo di specialisti en diversa landi (preco : 1 shilling, fr. 1,25, M. 1).
En novembro aparis che « Imprimerie Chaix » nia Hispana Guidlibreto (da nia devota samideani A. Galant e Petro Marcilla, de Madrid), e nia Italiana Guidlibreto, da anonima samideano. Ad ica e ad iti ni expresas hike nia varma gratudo. Ta Guidlibreti tute similesas la ceteri per formo, konteno e preco.
