Page:Poesie napoletane - Ferdinando Russo.djvu/80

From Wikisource
Jump to navigation Jump to search
This page has been proofread.
78
poemetti del cuore


Tu, sola tu, sultanto tu, resistere
l' 'e fatto, me pe tte, pe tte sultanto,
comm' a nu sciore eterno e sulitario,
comm' a na lampa, int' a nu Campusanto!

Uocchie, chiagnite! Vuie c' 'a cuntemplasteve
cu tanto ammore addulurato e tristo;
vuie ca senza guardà, sempe, 'a vedisteve
purtanno 'a croce comm' a Giesù Cristo;

vuie, c' abbruciate, sempe, ve fermasteve
p' 'a vedè mmiezo 'e stelle, addò 'a vedite,
mo' ca ve parla e che c' ha dato ll'anema,
chine d' ammore santo, uocchie, chiagnite!

Sfucateve, accussì! So' belle, 'e llacreme,
ca ve stanno spuntanno 'a dinto 'o core!
Sfucateve accussì! So' belle, 'e llàcreme!
So' pperle rare! Lacreme d'ammore!