Page:Poesie napoletane - Ferdinando Russo.djvu/65

From Wikisource
Jump to navigation Jump to search
This page has been proofread.
63
sunettiata





LACREME


I.


Na lucanna stu core è addeventato,
ogne mumento arriva nu penziere...
Se mpizza e zitto. E quanno s'è mpezzato
nun n'esce cchiù... Se conta e nun se crere!

Quaccheduno m' avesse sullevato!
Tutt' 'e na pasta so' sti passaggiere!
Ognuno 'e lloro, appena sistimato,
me mette ncroce ch'è nu piacere!

'O primmo doce doce murmura:
« Essa nun te vo' bene! » E pe ttramente
chisto fa chesto, n' auto tuzzulea...

Trase e me dice: « Sempe, suffrarai! »
Ma pecchè, ma pecchè tanta turmiente?
Nun putarraggio accujetarme mai?!