Page:Poesie napoletane - Ferdinando Russo.djvu/400

From Wikisource
Jump to navigation Jump to search
This page has not been proofread.


’O MAL’ UOCCHIO

— Don Pietro mio, tenite na mugliera,
’o Signore v’ ’a guarda pe cient’ anne !
Pare na schiusa ’e rose a primmavera !
’A salute le scappa ’a fora ’e panne !

Tosta, ncerata, come manco ’a cera !
Addu vui nun ce tòzzano, ’e malanne ?
Cresce ’a matina e scumparisce ’a sera
na cuntentezza longa ’e ciento canne !

Ah ! Benedico ! Manco nu catarro !
Sulament’io songo nu cippo ’e guaie!...
— Sapite ’o mutto, ’on Ci’ ? « Vino c' ’o carro!»

— Che carro e carro ! Ccà cuntammo ll’ ore!
—(All’ ossa rotte ’e chi te vattiaie !
Aglie e fravaglie ! Chisto è jettatore !...)