Page:Poesie napoletane - Ferdinando Russo.djvu/380

From Wikisource
Jump to navigation Jump to search
This page has not been proofread.


(’O rumito)

III.

— Chesta Vergena ccà, sempe ludata,
annunco e sempe, è assai miraculosa !
Chesta è la primma ch’ è stata truvata
mmano all’ antiche... Chesta è na gran cosa

Se mette dint’ ’a sacca ’a Mmaculata,
’a Madonna ’a Saletta ’a Purtentosa,
chella d’ ’a Pignasecca e ’a Nunziata !
Chesta è assai cchiù misericurdiosa !

’O Figlio ? Nne va pazzo ! ’E ggrazzie fatte
so’ tante e tante, ca te mbroglia ’o cunto !
Quann’ ’a prieghe c’ ’o core, nun fa patte!

Si ’a venerate, nn’ acquistate ’e ciele...
E se sape, ca llà sta tutto ’o punto !
Me’, bbona ggè’ ! Nu piezzo p’ ’e ccannele !