Page:Poesie napoletane - Ferdinando Russo.djvu/38

From Wikisource
Jump to navigation Jump to search
This page has been proofread.




'E NOTTE


(int' a nu vico)


—Nce simmo?—Se', nce simmo.—Richiarate!
—C''o prummesso... Chi songo sti signure?
—Amice, n'è paura!... 'Un dubitate,
ca ccà nun state mmano 'e ccriature!

—Comme fosse... è n'offesa ca me fate?...
—Comme se ndenne?...—Ch'è! Ve sape a ddure?...
—Gniernonzignore! Avimmo addimannate...
—Avite pigliat'asse pe ffigure!

—Già ch'è cchesto...scusate.—Niente! A nuje!...
Po' se sentette 'a botta 'e na pistola,
nu strillo e nu mmalora 'e fuje fuje.

S'arapette nu vascio. Na figliola
cacciaie 'a capa:—Cielo! E che sarrà?!...
E po' nzerraie, turnannose a cuccà.