Page:Poesie napoletane - Ferdinando Russo.djvu/222

From Wikisource
Jump to navigation Jump to search
This page has been proofread.
220
piccola borghesia


II.


— Ma c'aggia fa! Me state mbriacanno
in tal modo, ca perdo 'e ccerevella!
Zi-Pascalino ha da fa chesto ogn'anno!
— E vattenne, ca si' na muzzarella!

Stai da tre giorni in casa, revutano,
e nun me sai ncullà na casarella!
Comme! tu vide ca te sto ajutanno,
e fai l'atto 'e superbia e l'angarella!

L'aseniello addò sta?... —Ma che ne saccio!
Le stanno danno na mana 'e vernice...
— E San Giuseppe? Le manca nu vraccio?!

E 'o voie? È senza corne? E comme va?
E nun me siente? Bestia! Che nne dice?
— 'E ccorne?... Addimandàtelo a papà...