Page:Poesie napoletane - Ferdinando Russo.djvu/201

From Wikisource
Jump to navigation Jump to search
This page has been proofread.
199
poemetti del cuore

Mo' t'aggio perza! Nun me vuò cchiù bene!
Nun me guardano cchiù, chill'uocchie nire!
Cchiù nun te coce, 'a freva dint' 'e vvene,

pe me, pe me, ca scellaratamente,
comm'a nu pazzo o comm'a n'assassino,
t'aggio affennuta, pe na cosa 'e niente!

Addò m'aggio 'annasconnere? Che morte
me pozzo dà, mo' ca me guardo attuorno
e veco nchiuse tuttuquante 'e pporte?!

E pure, si sapisse int'a stu core
che curtellate me danno 'e penziere
e che morte me dà chistu delore,

tu, piatosa, tu bella, e tu nnucente,
si te putisse vennicà dimane,
tu, ntenneruta, nun farrisse niente...

anze... chi sa!... me stennarrisse 'e mmane...