Page:Poesie napoletane - Ferdinando Russo.djvu/156

From Wikisource
Jump to navigation Jump to search
This page has not been proofread.


SI TU SAPISSE
Si tu sapisse ’o male ca m' 'e fatto,
nun t’ abbastasse a chiagnere, nu mare !
Ma mo’ chill’ uocchie tuoi lucente e care
nun songo niente, niente cchiù, pe me !
E chisto core, abbandunato e tristo,
chino d’affanne e di ricuorde amare,
porta na croce comm’ a Giesù Cristo
e saglie nu Calvario, appriesso a te.

Saglie. ’A muntagna nun fernesce mai
pecchè mai fernarrà chisto delore !
Quanno veniste, s’arapette ’o core
nnanza all' ammore che lle dive tu...
Ma quanno me lassaste e te ne jiste
senza ’o cunzuolo manco ’e na parola,
st’ anema sperta, abbandunata e sola,
manco ’a speranza ’a sustenette cchiù !