Page:Poesie napoletane - Ferdinando Russo.djvu/122

From Wikisource
Jump to navigation Jump to search
This page has been proofread.
120
poemetti del cuore




VOLA, PENZIERO MIO




Vola, penziero mio, pe ll' aria nera!
Ogne nuttata 'a faccio chiara chiara!
Vola addò vide 'e sciure 'e primmavera!
Mmiezo 'e sciure sta Essa! Ohi, vita amara!
Vàsala nfronte, cercale a chi penza,
e si dorme, accarezzala, accussì,
e dint' 'o suonno falle 'a cunfidenza
ca chisto core mio sta pe mmurì!

Vola, penziero mio, pe ll' aria doce!
Arriva a Essa e vide che te dice!
Falle a sapè ca chisto core coce,
ca chiagne sangue, ma ch' 'a benedice!
Vàsala mmocca; falle na curona
de stelle d' oro e de felicità,
e dincello, cu tutt' 'a passiona,
ca chisto core mio spirato è già!