This page has been validated.
—18—
Natay á sitatalna
ni Ari Don Arturo del Día
siraragsac ti rupana
á nangyaoat ti bendicionna.
Idi nalpas naioac-oacasda
ti narambac unay á ponponna
ni lumlumdaang á reina
indanagna ti casasaadda.
Marip-ripiripeo anacco
á dican saman icascaso
ti bilin di dacquelmo
á pamuspusan ti rigat-tayo.
Dicapay la panpanonoten ina
ti panangasaoac ditá princesa
ta daytoy naquemco caalasna
nga asaoaec gaput ta pirácna.
Dicapay la madandanagan
ta pagbao-baoentapay toy leddaang
siacto ti manĝipamuspusan
punasem, ina, daguita luluam.
Aoanngatan, anacco ti pamuspusanen
no daytay princesa dica asaoaen
ta no gubat ti aramaten
toy concienciac dina aoaten.
