Page:Mistral - Mireille-Mirèio (1861).djvu/186

   E tout en lampant dins li terro,
   Remiéutejavo sa coulèro ;
E de l’aspre despié que ie gounflo soun lèu,
   I code que la Crau n’es pleno
   Coume un bouissoun de sis agreno,
   Pèr se batre aurié cerca reno !
Aurié de soun pounchoun fichouira lou soulèu !…

   Un porc-singlié que de sa tousco
   An fa parti, e que tabousco
Sus li moure desert de l’Oulimpe negras,
   Avans de courre sus li chino
   Que lou secuton, revechino
   Lou rufe péu de soun esquino,
En amoulant si pivo i pèje di blacas,

   À l’endavans dóu gardo-vaco
   Que lou mourbin pounchouno e maco,
Dins lou meme draiòu lou bèu Vincèn venié
   E dins soun amo risouleto,
   Revassejavo i parauleto
   Que l’amourouso piéuceleto
I’avié dicho un matin dessouto l’amourié.

   Dre coume un canié de Durènço,
   Éu caminavo ; e de plasènço,
E de pas, e d’amour clarejavon sis èr ;
   L’aureto molo s’engourgavo
   Dins sa camiso que badavo ;
   Dins li coudelet caminavo,
Descaus, e lóugeret, e gai coume un lesert.