Page:Mga awit sa kabukiran (microform) - mga balitaw, mga kolilisi, mga garay ug mga balak (IA aqr7923.0001.001.umich.edu).pdf/7

SA MGA MAGBABASA

---

 Ako sama sa Putyukan nga naniba sa mga bulak

Sa tikahanawong tanaman sa karaang katitikan;

Sa akong pag-adto mao na unta ang pangapulak

Sa maanindutong piyuos nga sa kaamyon nawad-an.

⁂

 Daw kandilang masiga ako kanimo itunol

King basahong gamay bunga sa akong mga kabudlay,

Aron ang iyang kahayag kanimo magatultol,

Sa dalan nga mangitngit sa karaanang mga garay.

⁂

 Ikaw na magbabasa ang magsaway ug maghukom,

Dili sa pagdalayig sa akong mga maayong tuyo.

Kong mabasa mo dinhi dili masabut nga mga pulong,

Pinaagi sa usa ka sulat, sa kahulugan pangayo kanako.

⁂

 Gihalad ko kini alang sa atong Yutang Natawohan,

Sa kuldas sa kitara gitagik kining kabulakan

Nga ipurongpurong ko sa lubong sa akong mga Apuhan

Diin ang tunob sa Inahan tang Yuta buot kong hagkan