— 19 —
Votikel, kel kanom konsefön töbo fefi omik sumom mafi de nud tedatäv ela, nonlogom pokabukili omik e kalom.
«Franis kiltum!
— Kanob labön nosi tatos, plo suäm at vilob viliko selön ole nudi obik.
— Ab mekob nog stipi, das ut de obs, kel nosom lemi, mütom pelön fladis bals de jamänavin.
— Benö, atos binos gidik!
— Sikod li-lensumol?
— Zelado!»
Votikel, kel logom ko gälod, das plisenels valik lieloms pükoti ko nited mödik, pelom tedatävele franis kiltum in noäts e pükom poso loviko ko bötel. Bötel lüvom cemi smülölo e gekömom pos minuts anik ko zäp kela fins binems vieglutöl. Pos vineg de lemel, bötel nilom tedatäveli e kipom zäpi glutöl dis nud omik.
«Kisi atos mütos malön?
— Binos zäp glutöl, gepükom lemel; if lemob bosi, labob kösömi küpamalön osi, voto äkanonöv ba blünön obe latikumo bosi de liköf luumo gudik. Elemob nudi olik, sikod mütob küpamalön omi.
— Negelo osufob atosi, sevokom tedatävel, e jedom zuniko noätis su tab.
— Epelob foviko, sikod nud olik lönom obe, gitomafiko, ifi dalob nog de bekipön omi jü deil, olik. If no vilol ye sufön, das küpamalob omi, balam obsik penosom.
— Ädesidoböv logön oli in plad obik!
— No eselob, elemob! Sikod mütob küpamalön lemi obik, u mütol pelön fladis bals de jamänavin. Söls valik binoms noels obik!
— Lesi, mütom pelön!» Valiks äsevokoms.
Tedatävel äbizugom ye lüvön sogi in spid gletikün.
