— 12 —
«Iko-li?»
«Bi binom so bleinik, söl; ven äbinob in cem omik äsäkom obe telna, kiöp hät obik äbinom, e du tim valik at älabob omi su kap».
Lisälam.
Söl: Sagolös pul, kis binos kod, das dog olik binom so nepinik?
Pul: No fidom.
Söl: Kikod no fidom?
Pul: Givobs ome nosi.
Söl: Kikod givols ome nosi?
Pul: Labobs nosi.
Yagel e Feilel.
Yagel sembal, kel iyagom ya del lölik nen sek lebalik, äkömon lä lakil, kiöp äsvimoms döks magifik. Bi no ävilom getävön al döm nen fanot, äsäkom feilele, kel äsiedom nilü lakil: «Li-dalols, da jutob balna su döks at? Opelob olse plös franis lul».
«Leviliko, söl».
Yagel jutom, e döks neläbik fol binoms pefunöl.
«Bafö!» sevoköm feilel, e getom franis lul.
«Li-dalols nog juti bal, plo suäm ot?»
«Leviliko, söl».
Jut telid binom so seklik äs balid e feilel getom denu franis lul. Yagel, kel logom das feilel smülom, säkom ome: «No li-dolos olse, das funob dökis so mödik?»
«Leno, söl, no lönoms obe».
In timil at lönel dökas älüspidom, e binos nepöfüdik sagön, das yagel äpelom dökis omik mödo delidikum ka su malitöp.
M. J. Verbrugh.
