— 11 —
VENDELAZÄL LÄ CHARLES NODIER.
Lautel Charles Nodier älabom ofen sogis smalik in dom omik. Lä pöt somik lavogel sembal vemo pükotik äkonom ventüris omik in Pürenäns.
«Vöno», äkonom, «äbinob in nebel lenabik. Süpito legob bifü ob beri gianik. Votaflekob obi pejeköl, e loegob po ob ludogi gletik. Kisi idunolsöv, läds? Äsumob tabäkedaböki obik e äjedol tabäkedi in logs ludoga, kel lafiko bleinik äfalom bevü rals bera. Täno äsäspidob stiliko».
Charles Nodier äsagom: «Jen olsik binom vo levemik, ab zid obik binom nog selednikum. Äbinob in Apenins bevü Napoli e Taranta. Süpito logob lapinelis lul, kels lüspidoms al ob. Ko smagün in det äfunob balidi; ko smagün in nedet äfunob telidi, ko däg in det äfunob kilidi, e ko däg in nedet äfunob folidi».
Nodier äneluimom oke logodi, äsifäbinom nog pebebludöl de mölod… e äseilom.
«E li-lulid?» äsäkom lavogel.
«Lulid äfunom obi», ägepükom Nodier blefo.
Fam monälana.
A: Li-binos velatik, das esagol ädelo in kaföp das binob monälan?
B: Li-ob? Tadilo; äbinob eb pösod lebalik, kel no esagom osi!
Söl bleinik.
«Li-eblinol söle Hernandez penedi, keli egivol ole?» söl sembal äsäkom dünane omik, kel äbinom ze nepekulivöl.
«Si söl», dünan ägepükom, «ab klödob, das no okanom liladön omi».
