nimi “tonsi” li pona a!
tan jan Olipija
tonsi li seme? tonsi la, kepeken tu li lon. kepeken nanpa wan la, tonsi li mije ala li meli ala. kepeken ante la, tonsi li ni: mije tawa meli anu meli tawa mije anu meli/ mije tawa tonsi.
kulupu pi toki pona la, jan tonsi mute li lon. ona mute li pilin e ni: nimi “tonsi” li nimi pona a. ona li kepeken e nimi ni. jan mute li toki e ni: “mi jan tonsi” anu “mi tonsi meli” anu “mi jan mije tonsi” anu nasin mute ante.
jan ante li toki e ni: “toki pona li toki lili. o suli ala e ona. mi wile ala e nimi tonsi.”
taso sina weka e nimi “tonsi” la, jan tonsi li ken ala toki pona e kon ona. ona o toki e ni: “mi meli ala. mi mije ala. kon mi li ante” anu “mi meli. taso tenpo pini la, mi mije” anu toki suli ante.
nasin ante ni li suli li pona ala. mi jan tonsi. mi wile toki e kon mi la, mi wile ala toki e toki suli ni.
kulupu li pilin li toki e seme?
mi pana e lipu tawa kulupu pi toki pona. lipu li toki e ni: “nimi “tonsi” la, pilin sina li seme?”. jan pi kulupu ni li pana e pilin ona tawa mi. ona li lon ma pona pi toki pona, lon ilo Siko, lon ilo pi lipu sinpin, lon ilo Telekan, lon ilo Wesi.
jan Wilo li toki e ni: “mi tonsi. lon la, kule mi li telo. lon la, lawa mi la, pilin mi la, nimi “tonsi” li pona mute.” kulupu Aponi li toki e ni: “mi tonsi. mi wile e nimi tawa mi. tu kon li ike. mute kon li pona.”. jan tonsi mute li toki e toki sama.
kin la, jan li wile ala pana e nimi ona tawa mi. ona li sitelen e ni: “toki pona li wile e nimi ‘meli’ anu ‘mije’ la toki pona li wile e nimi ‘tonsi’.” jan mute li toki e toki pi kon sama. kili Apu li toki e ni; pilin mi la nimi “tonsi” li suli. jan tonsi li ken kepeken li kepeken e ona tan ni: ona li mije ala li meli ala. jan Ewa (Eva) li toki e ni: “mi ale o kepeken e nimi ‘tonsi’.” (mi ante e toki ni tan toki Inli).
jan Kaja li toki e ni: “nimi ‘tonsi’ li pona tawa mi. ona en nimi ‘meli’ en nimi ‘mije’ li suli sama. taso, tenpo lili la mi toki kepeken nimi tu wan ni. tenpo mute la mi toki taso e nimi ‘jan’.”
ante lili la, jan Salin li toki e ni: “mi mije ala li meli ala, mi toki ala e nimi ‘tonsi’. [taso] nasin mute li pona tawa mi. mi wile e ni: toki pona li pona tawa kulupu kule. mi wile pana e pilin pona tawa jan ante.” jan li pana ala e nimi ona tawa mi. ona li toki e ni: “mi kepeken ala ona. mi sona e ni: nimi ni li pona tawa jan mute. ona li kepeken ona, la ni li ike ala tawa mi. taso tawa mi la, ona li ike.”
