kulupu
lipu tenpo o kama pona!
tan jan Telakoman
toki pona li seme? toki pona li nasin toki suli anu toki lili suwi taso? mi mute li sona e ni: toki pona li ijo suli li nasin pona. taso jan mute li sona ala e ni.
tenpo pini lili la mi mute li toki e ni: kulupu ISO li pana ala e nimi lili ilo tawa toki pona tan seme? kulupu ISO la toki pona li toki suli ala tan seme? jan mute li kepeken toki pona. taso lipu anu sitelen tawa anu ijo sama ni la ijo pi nanpa lili li lon toki pona.
ni la mi mute li toki e ni: mi o pali e lipu tenpo! lipu tenpo li seme? lipu tenpo li lipu sama ni: kulupu pi jan sitelen li pali e lipu sin lon tenpo mute. lipu sin ale pi lipu tenpo li jo e nimi sama, taso lipu sin ale li jo e nanpa ante. lipu tenpo pi sona sin li ken pana e lipu sin lon tenpo suno ale. lipu tenpo pi nasin ante li ken pana e lipu sin lon tenpo mun ale anu tenpo sike suno ale.
lipu tenpo li ken pona mute tawa toki pona! jan pi toki pona li pali e lipu tenpo la ken la kulupu ISO li lukin e ni li toki e ni: toki pona li nasin toki suli! taso nimi lili ilo pi kulupu ISO li suli ala. lipu tenpo li ken pana e ijo ante pona tawa toki pona.
jan wan li taso la ona li ken pana e lipu. taso ona li ken ala pali e lipu mute. ante la lipu ona li ken weka. lipu ona li awen la jan ante li ken weka e sona ona.
taso lipu tenpo la jan pona mute pi toki pona li kama kulupu sitelen. jan ale lon kulupu sitelen li kepeken e wawa ona tawa ijo sama. jan ale li kepeken e sona pona li kepeken e tenpo wile tawa ni: ona li pana e ijo pini pi pona mute.
lipu wan pi lipu nanpa li awen lon tenpo suli. jan mute li lukin e ona li kama sona e ijo tan ona lon tenpo suli.
ni li lipu tenpo nanpa wan lon toki pona. taso mi mute li toki ala e ni: mi mute taso li ken pali e lipu tenpo. sina o pali e lipu tenpo ante! seme li suli tawa sina? seme pi pali sina li mute a? moku pona anu nasin pilin anu sitelen musi li pona tawa sina, anu seme? o pali e lipu tenpo tawa ona!
lipu tenpo sina la sina ken pali e lipu sin lon tenpo suno ale anu sike suno ale. ni li suli ala. ken la lipu sina li lili li jo e lipu lili pi nanpa lili taso. ale li pona. ijo suli li ni: o pana e ijo pona lon toki pona. sina pali e ni la o pana e ona tawa mi mute, o pana e ona tawa jan ale!
