Page:Lettere 'a ll'Africa.pdf/16

From Wikisource
Jump to navigation Jump to search
This page has been validated.


II.


'E PARIENTE


— Guè, Federì, p'ammore r' 'a Maronna,
scrìvece 'ossà!... Nun ce fa sta 'npenziere!
— Va buono, oi-mà! Rate nu vaso 'a nonna,
n'ato a Sciascillo... —Ebbiva 'e bberzagliere!!...


— E statte zitto, mannaggia 'a culonna!
Ca si no me ncuieto c' 'o furiere!...
— E ch'è ! Te taglia 'a capa tonna tonna?...
— ... no, ma 'o mette all'arresto int' 'o quartiere!


—Fosse 'a Maronna! Accussì nun partesse!
Me ne turnasse cu mammella mia,
c' 'a vicchiariella mia, ca nun chiagnesse,


comme fa mo! Mamma pecchè chiagnite?
Me facite partì c' 'appecundria!...
Io torno c' 'a meraglia, n' 'o ssapite?!