maó dá ang pagtambag kanimo aron dili ká
palimbong kang Augusto. Panamini ang akong
gidangat. Gipakaingon kó nga ang una kong
pagkaligás walay "nada", apan mapait diay
ang pagasangputan. Si Pascual walá moilá sa
iyang anak kay kami naghigugmaay man lang
niadtong gabii nga siya misayaw kanako ug
gidalá ako niya sa iyang automobil. Pagbantay bayá pagayo nianang manayaw kanimo.
Kong maligás ká, alaut kanimo kay ang bunga
sa imong gugma dili ilhon kay gugma konong
salingkapaw, gugmang lumalabay, gugma sa
duhá, tuló, upat ka takna.... Pagbantay pagayo
ug ayaw gayud palimbong kang Augusto.
Imong higala sa gihapon,
- ANDREA MALAESTRELLA.
Magbabasa: ang sugilanon sa itaas nga imong nabasa, maó ang kasaysayan sa giingon: "Ang gugma dili katiawan. Usahay, usá ka gutlo nga gugma, mahimong usa ka tuig nga pag antus". Kadaghanan sa mga babayeng nangaalaut naingón gumikan sa ilang walay pagbantay ug gumikan sa ilang pagtiaw-tiaw sa gugma.
