Miagi ang usa ka tuig. Si Pascual didto gihapon sa Manila. Usa ka lunes niana nga maoy iabut didto sa bapor "Cebu", si Pascual nakadawat ning mosunod nga sulát:
"Higala Pascual:—Si Andrea umaanak ug siyá nagingón nga ikaw maó ang amahan sa bata nga iyang gisabák. Nagingon usab nga dili siyá mopugós kanimo sa pagilá sa imong anak kay dayág man nga ikaw dili moilá tungud kay salingkapaw man láng ang inyong gugma ug usá dá man kagabii ang paglungtad. Gibalita kó kini kanimo aron sa imong kasayuran.
Ang imong mabinatíong higala,
- AGUSTIN SORIANO."
**
*
Si Andrea nanganák ná. Si Pascual nagpakabutá-bungol sa tanang nahitabó. Unsaon kó pagilá sa usa ka bata nga bunga lang sa usá ka gugmang lumalabay, nianang gugma nga moturók lang kong makasayaw sa "bailarina"I—pulong pa ni Pascual.
Si Andrea mikagyo tungud sa kaulaw ug sa hilabihang pagboyboy kaniya sa iyang mga ginikanan. Ug sukad sa lungsod nga gikagyohan ni Andrea siya nagsulát kang Abing, usá ka kauban niya sa "salón de baile", ning mosunod:
"Higalang binati:
Pinadpad sa akong mangil-ad nga palad, adía karon akó ning lungsora nagtago sa akong kangil-ad ug kinabuhi. Ang tuyo ning sulát
