—Dili mahimo, Elvira; sultihan kó gayud si Tatay ug si Nanay mó ning atong pagkabutang; sultihan ko silá nga kitá naghinigugmaay ug ang akong mga tinguha pulos matarong ug dili ang pagpasipala kanimo.
—Ayaw lagi intawon ug sultihi, Luis. Kasab-an unyá akó, paw-on. Dili ka bá malooy kanako?
Maó kini ang nabati nga sulti sa duhá ka mga binihag ni Cupido, sa taliwala sa usá ka tanaman nga anaa mahimutang sa luyó sa usá ka Simbahan.
Ang kagabhion matahum uyamut. Ang Bulan nagakasalop na, daw n'aikog nga modanag niadtong duha ka kalag nga nagkinahang lan sa kangitngit, kanang tabil nga dakú ug maitum sa Kinaiya nga gihalaran sa mga naghigugmaay, aron motabon sa ilang mga paniba sa dugós nga matam-is sa gugma.
**
*
Gabii. Ika 7 ang takna. Usá ka tigulang lake, nga nagsapót ga usá ka amerikanang malinis, misaká sa balay ni Elvira ug naghatag "maayong gabii".
—Maayo, dayón—mitubag si Capitán Martin, amahan ni Elvira nga tigulang usab.
