Saccanu—Famígghia antica d'origgini greca, ch'avìa diversi barunii; e Japicu Saccanu fu lu terzu cumpagnu di Camuliu e di Patti, chi jeru a prigari a lu conti Ruggieru pri libbirari la Sicilia.
Armi: Funnu russu cu du' fasci d'oru pri longu.
Sclafani—Famigghia tudisca, carrïata ccà da un Giuvanni Sclifani o Sclafani, chi sirvìu sutta Gugghiermu lu malu, e l'addifinnìu 'ntra la cunciura di Mattiu Bonellu, e nn'accansau lu casteddu Megeriu cu li so' dipinnenzi. Li so' discinnenti fôru conti d'Adirnò e poi fineru 'ntra la famigghia Muncada.
Armi: Scutu spartutu 'n dui pri longu, un latu argentu cu 'na grù niura, e un latu niuru cu 'na grù argentu.
Secusiu—Famigghia nurmanna, chi vinni a li tempi di lu re Ruggieru. Ottaviu Secusiu fu un bravu pridicaturi franciscanu, e lu papa Crimenti Ottavu lu mannau comu ammasciaturi (nunziu) 'n Francia, 'n Savoja, e poi lu fici patriarca di Custantinobbuli; Bonavintura fu giustizieri; nautru Ottaviu a lu 1630 fu lu primu principi di Santa Fravia.
Armi: Funnu turchinu cu dui fasci d'oru pri largu; supra e sutta di li fasci 'na stidda e un S 'ntra lu menzu. Curuna di principi.
—Ma di st'urtimi tri famigghi nun cc'è nuddu ôi? spiau un Pinzuni.
Griddu—'N quanto a mia nun ni sacciu.
Sparti di chisti chi v'haju ammuntuatu, cci nni fôru autri, comu Ruggieru di Barnavilla ch'appi Castrunovu; 'Riicu, frati di la cuntissa Adilaidi, Butera e Chiazza; Guffredu Borellu Milazzu ; Gugghiermu Maluspatariu Ar- girò; Amelinu Gastineddu Giraci; Guffredu di Saggeju Caccamu; Rodurfu Bunellu Carini; Rinardu e Rubertu
