a Terranova lu conti di S. Secunnu. L'arma è: funnu russu c'una stidda d'oru cu la cuda. Curuna di principi.
Guffredu Rossu, frati di 'Rricu, fu conti di Muntiscagghiusu, 'ntra lu Napulitanu, e appi tantu chi diri cu Gugghiermu lu malu; Catardu fu ammasciaturi a lu 1293, e nautru Rossu, conti d'Aiduni e di Scrafani e baruni nentimenu di vinti casteddi, fu granni ammiragghiu, e fu puru chiamatu patri di la patria, p'avilla sarvatu quattru voti di lu sdisordini. Un Manueli, famusu littiratu, si distinguiu 'ntra lu parramentu sicilianu di lu 1812, e fu cunsigghieri di Statu.
Saccanu—Famigghia...
—Aspetta; unni si' juntu? lu 'ntirrumpìu lu Prisidenti. Già affirrasti la littra esse, mentri di l'erre cc'è ancora lu megghiu pezzu.
Griddu—Ma chi ti sta' 'nsunnannu ?
Prisidenti—A ddu grann'omu di Ruggieru Settimu chi ti lu jucasti?
Griddu—Sta' pigghiannu ramurazzi pri sosizza. Quannu mai Ruggieru Settimu ha statu nurmannu! Lu Settimu nun è nummaru, ma lu nomu d'un casteddu di Pisa, e, secunnu l'usu di ddi tempi, si lu 'mpiccicaru pri nomu.
Prisidenti—Oh! trivulu... E iu ca l'haju aspittatu cu li vrazza aperti, e nn'haju avutu un spinnu granni di sintirinni parrari; ora m'haju a stujari lu mussu...
Muscagghiuni—Bah! vidi di cuntintallu a lu nostru Prisidenti; cuntacci quarchi cusuzza, macari ammucciuni di tò soggira.
Griddu—Abbasta, 'mmenzu parentisi vi dicu, chi a lu 1431 un 'Ntoniu, conti di Settimu, purtau ccà la sò famigghia, e acquistau la barunìa di Tavi e lu casteddu di Mazzàra, e, a nomu di sò figghiu Simunettu lu statu di Giarratana; Giuvann'Antoniu fu marchisi di Giarra-
