चाळिसाव्या वर्सा रमजान म्हयन्यांत एका दिसा घोलींत ताका एक खणखणीत आवाज आयकूंक आयलो. 'विश्र्वाचो निर्मातो आशिल्ल्या ईश्र्वराच्या नांवान जप कर' अशी आज्ञा ह्या आवाजान ताका केली. ताका लाबिल्लो हो ईश्र्वराचो पयलो संदेश आशिल्लो. हीच खरी कुराणाची सुरवात आसा अशें मुसलमान लोकांचें मत आसा. ताणें हो आपलो अणभव खदीजाक सांगलो. उपरांत कांय दिसानीच ताका मळबांत एक आकृती दिश्टी पडली. आपूण गाब्रिएल आसून तूं (मुहंमद) ईश्र्वराचो दूत आसा अशें ते आकृतीन मुहंमदाक सांगलें. तेन्नाच्यान ताका मरमेरेन अशी तेरेची ध्वनी आयकूंक येताले. ती देवाचीच वाणी आसा अशें मानून तो ती आपल्या भोंवतणच्या लोकांक सांगतालो. वांगडाच बरोवन दवरपाची वेवस्था करतालो. सुमार ६५० अल्लाचे संदेश ताणें एकठाय हाडले आनी ते रितसर मांडून कुराण रचलें. कुराणांतलो एक एक शब्द म्हळयार अल्लाच्या तोंडांतल्यान भायर पडिल्लें पवित्र उतर अशें इस्लाम धर्माचे अनुयायी मानतात. मुहंमदाच्याय मताप्रमाण कुराणांत ताचें स्वताचें अशें कांयच ना. जें कितें देवान ताका सांगलें तेंच ताणें बरयलें अशेंय ताणें सांगलां.
कुराणांत ताणें एकेश्र्वरवाद आनी भौशिक बंधुभाव हांचें संमर्थन मूर्तिपुजेचो निशेध आनी गिरेस्त लोकांनी आपल्या अर्दया धनाचो त्याग करून तें गरिबांक वांटप हाचेर भर दिलो. मरण म्हळ्यार जिणेचो अंत न्हय, मरणाउपरांत लेगीत आत्मयाचें जिवीत चालूच आसता. देवाच्या न्यायादिसा (कियामत) व्यक्तिच्यो सगळ्यो करण्यो मेजून ताका फावो तें इनाम वा शासन दिता अशी ताची शिकवण आशिल्ली. ताच्या तेंपार जे वायट गूण समाजाक पोखरताले, ते पयस करपाखातीर ताचे हे यत्न आशिल्ले. सुरवेक हे संदेश ताणें आपल्या सोयऱ्याधायऱ्यांक आनी कांय इशटांकूच समजावपाचे यत्न केले. पूण उपरांत हे संदेश ताणें हेर लोकांभितरूय पातळावंचे असो ताका आदेश जालो.
ह्या संदेशाचो हेर लोकांत प्रचार करून ताणें कांय अनुयायी एकठांय केल्ले मक्केचे लोक साबार सैमीक देवांक मानताले. मक्केच्या गिरेस्त वर्गाची सत्ता आनी संपती हांचेर मुहंमदाच्या संदेशांनी बाधा हाडली. कावाच्या देवळाच्या रूपान सगळ्या अरब टोळाच्या धर्मपंथांचें केंद्रिकरण जाल्ल्यान मक्केच्या प्रतिश्ठीत वर्गाच्या हातांत जी धर्मीक सत्ता आशिल्ली, तिकाय एकेश्र्वरवादाक लागून धोको निर्माण जाल्लो. ताका चारूय दिकांतल्यान विरोध जावपाक लागलो. ताका जरी ल्हानशा उंचेल्या गटांचो तेंको मेळिल्लो, तरी जेन्ना ताच्या नात्यांतल्यान कांय लोकांकडच्यान ताका विरोध जावपाक लागलो तेन्ना हेरांनी ताका हिणसावपाक सुरवात केली. मुहंमदान आपल्या संदेशाचो प्रसार थांबोवचो म्हूण ताका मक्केचो मुखेली करपाचो आनी संपती दिवपाचें थारायलें. पूण मुहंमद तांचे भकिक पडलो ना. ताणें आपलें कार्य चालूच दवरलें. मुहंमदाच्या अशा वागण्याक लागून मक्केंतलीं मुखेल कुटुंबां एकठांय येवन तांणी मुहंमदाचें आनी ताचो बापोलयो अबू तालिब हाच्या कुटुंबियांचेर समाजीक बहिश्कार घालो. हाका लागून मुहंमदाक खूब त्रास सोंसचे पडले . दुसरेवटेन ताच्या अनुयायांचोय छळ जातालो . ह्या त्रासांतल्यान वाटोवपाखातीर मुहंमदान तांकां ऑबिसियाना हांगा धाडले.
६१९त खदिजा आनी अबू तालीब हांकां मरण आयलें आनी ताचो दुसरो बापोलयो अबू लाहाब हो हाशिम टोळयेचो मुखेली जालो. अबू लाहाब हाचो गिरेस्त वेपाऱ्यांकडेन संबंद आशिल्ल्यान तांचे सांगणेवयल्यान तांणी मुहंमदाक संरक्षण दिवपाचें न्हयकारलें. आतां मुहंमदाचो चड छळ जावपाक लागलो. ह्याच सुमाराक मदिनेंतल्यान मक्केक यात्रेखातीर एक प्रतिनिधमंडळ आयिल्लें. अलअन्सार आनी खझ्त्रज ह्या मदिनेंतल्या दोन टोळ्यां भितर मुहंमदाचे शिकवणेक लागून शांतताय पातळटली अशी आशा निर्माण जाली. मुहंमदाचे शिकवणेक लागून तांणी इस्लाम धर्म आपणायलो. मदीनाक परतल्या उपरांत तांणी मुहंमदाच्या संदेशाचो प्रचार करपाक सुरवात केली . ६२२ व ७५ लोकांचो एक पंगड मदिनांतल्यान मक्केक यात्रेखातीर आयलो. तातूंत कांय बायलांचोय आस्पाव आशिल्लो. तांणी इस्लाम धर्म आपणावन मुहंमदाची राखण करपाचो सोपूत घेतलो. मदिनान दिल्ल्या आंमत्रणाउपरांत तांणी आपल्या अनुयायांक मदिनाक धाडले. तो मदिनाक वचचे पयलीं मक्केंतल्या कांय मुखेल कुटुंबानीं ताची हत्या करपाचो कट रचलो. पूण हाचे पयलींच ताणें अबू बकाराच्या सांगातान मदिनाचो रस्तो धरिल्लो . हिजरी ह्या इस्लामी काळाची हांगाच्यान सुरवात जाता.
मुहंमद मदिनाक पावल्या उपरांत ताच्या जिविताक आनी इस्लामाच्या विकासाक एक नवी दिका मेळ्ळी. मदिनाचे लोक आनी मक्केसावन आयिल्ले मुहंमदाचे अनुयायी हांच्यांत बऱ्यापणाचे संबंद निर्माण जाले. मदिनाच्या टोळयांमदीं शांतताय हाडपाक मुहंमदाक यश आयलें. मदिना हांगा मुहंमदाचें बळगे तशेंच मान वाडत रावलो. ताचे अनुयायीय वाडत वताले. मदिनेंतल्या चडशा सकयल्या वर्गांतल्या अरब लोकांनी इस्लाम धर्म आपणायलो. ह्या सगळ्याक लागून आपल्या वेपाराक धोको निर्माण जाला, हो भंय मक्केंतल्या लोकांक सतायतालो. हाका लागून तांणी मदिनाचेर घुरी घाली. पूण आपल्या ३१३ अनुयायांच्या आदारान मुहंमदान तांचो पराभव केलो. ह्या पयल्या जैताक लागून मुहंमदाक आनी तांच्या अनुयायांक व्हड मानसिक नेट मेळ्ळो. उपरांत मुहंमद आनी मक्केचे लोक हांचेमदीं दोन झुजां पेटलीं. दोनूय खेपो मुहंमदान जैत जोडलें. मुहंमदान मदिनेंतल्या ज्यू लोकांकूय धारेर दवरिल्ले.
मदिनेक आयलेउपरांत मुसलमान जमातिची धर्मीक आनी समाजीक घडी वेवस्थीत बसोवपाखातीर मुहंमदान रातदीस यत्न केले आनी ह्या ताच्या यत्नांक यशूय आयलें. खदीजा आसतना तांच्यांत खूब बायलो दवरपाची रीत आसतना लेगीत ताणें दुसरें लग्न करूंक नासलें. पूण मदिनेक आयले उपरांत राजकीय कारणां खातीर ताका लग्नां करचीं
