Page:Konkani Viswakosh Vol3.pdf/583

From Wikisource
Jump to navigation Jump to search
This page has not been proofread.

अपायकारक आसता.

उपाय 1)अंदाजी (Presumptive), 2)मुळावो (Radical) आनी 3)भौशिक (Mass).

अंदाजी :

जोराचें निदान निश्र्वीत खबर नासल्यार क्लोरोक्वीनच्यो व्हडांक 4 गुळयो, ल्हानांक 1-2 गुळयो वांगडाच (भरिल्ल्या पोटार) दितात. मलेरिया आसत तर जोर वता. पूण त्या मनशाकडल्यान जळारांमार्फत मलेरियाची लागण हेरांक जावंक पावनां. अंदाजी उपायाचो होच मुखेल उद्देश आसा. पूण क्लोरोक्वीन दिवंचे पयलीं बोटाचें रगत, तपासाणेखातीर कंवचेचे पट्टेर घेवपाचें आसता. रगत तपासणेंत मलेरियाचे जंतू मेळ्ळ्यार पुनर्आजार जावंचो न्हय म्हणून प्रीमाक्वीन (Primaquin) नांवांचें वखद जातीप्रमाण चड-उण्या प्रमाणांत दिवंचे पडटा. गुरवारपणांत क्लोरोक्वीनपरस पाइरोमेथामीन (Pyrimethamin) हें वखद चड सुरक्षित आसता. ल्हव ल्हव क्लोरोल्वीन फाव तसो गूण दिना, तेन्ना पाईरीमेयामीन + सल्फाडॉक्सीन (Pyrimethamine + Sulphadoxine) अशीं पुरक वखदां दिवचीं पडटात. पूण हालीं हीं दोनूय वखदां फाव तशी परिणामकारी उरूंक नात. उपाय करूनय मलेरियाकलागून मरण येवपाचें प्रमाण दिसान दीस वाडतच आसा. मेफ्लोक्वीन (Mefloquin) नांवांचें नवें वखद प्रभावी आसा. पूण आजून तें भारतांत मेळना. पूण ताचो भलायकेचेर वायट परिणाम जावं येता असो दुबाव आसा.

भोशिक (Mass):

जळारांचे उत्पत्तीक बाधक अशा उपायाचेर भर दिवन वांगडा वशाच्या दिसांत लागशिल्ल्या लोकांनी आठवडयांतल्यान क्लोरोक्वीनच्यो खेपेक 2 गुळयो व्हडांक आनी 1 गुळी ल्हानाक दिवपाक जाय. मलेरियाचो आस्पाव आशिल्ल्या वाठारांत वा देशांत वचचे पयलीं 1सप्तक पयलीं, तशेंच गांव-घरा येवन 4-6 सप्तकांमेरेन गुळयो घेवपाक जाय.

वासिनां :

मलेरियाचेर चालू वखदां फाव तशीं गुणकारी नाशिल्ल्यान ताचेर वासीन सोदून काडप ही एक गरज जावन आसा. अशीं तीन वासिनां आसात. 1) स्पोरोझोईट वासीन (sporozoite), 2) जंतूबाधीत तांबडयो रगतपेशी वासीन (Parasitised R.B.C.), 3) मेरोझोईट वासीन (Merozoite) पयल्या वासिनाची सुरक्षा फकत 3 म्हयने. 2 आनी 3 वासिनांचेर खूब सोद जाला आनी तांचेकडल्यान खूब अपेक्षा आसा.

मलेरियाचो उगम जळारां आशिल्ल्यान आनी हळ्शीक ही जळारांखातीर पोसवण दिवपी जाल्ल्यान, घरां-दारां, पोरसां, खळयो अशो सुवाती नितळ दवरप खूब गरजेचें. पोऱ्या उदकाची सांठवण जावंक दिवप ना. जंय जाता थंय नेमान जंतूनाशक वखदां शिंपडावप अशा घरगुती उपायांतल्यान मलेरियाचेर बऱ्याच प्रमाणांत नियंत्रण दवरप शक्य आसा. - डॉ. आनंद हळर्णकार

मलेशिया  :

(उदेंत आनी अस्तंत)  : आग्नेय आशियांतलो एक सार्वभौम देश. क्षेत्रफळ 3, 30, 434 चौ. किमी. लोकसंख्या 20,932,901(1998). 16 सप्टेंबर 1963 दिसा स्वतंत्र जाल्ल्या ह्या देशांत सुरवेक मलाया, सिंगापूर, सारावाक आनी साबा हांचो आस्पाव आशिल्लो. पूण 1965त सिंगापूर हो स्वतंत्र देश जावन मलाया हो अस्तंत मलेशिया म्हूण आनी सारावाक आनी साबा हे दोनूय मेळून उदेंत मलेशिया म्हूण अस्तित्वांत आयले. हे दोनूय विभाग एकमेकासावन सुमार 640 किमी. लांबायेच्या दक्षिण चिनी दर्यान वेगळे केल्ले आसात. उदेंत मलेशियाचे उदेंतेक पॅसिफिक म्हासागर, उत्तरेक चिनी दर्या आनी सुलू दर्या, दक्षिणेक आनी अस्तंतेक इंडोनेशिया आसा. अस्तंत मलेशियाचे उत्तरेक थायलंड, दक्षिणेक सिंगापूर, नैर्ऋत्येक मलॅका सामुद्रधुनी, उदेंतेक दक्षिण चिनी दर्या आनी अस्तंतेक अंदमान दर्या आसा. क्वालालुंपूर ही देशाची राजधानी आसा. मलेशिया देश हो 13 राज्यांचो संघ आसून जोहोर, केदाह, केलान्तान, मेलाखा, नेगरी सेम्बीलान, पाहांग, पेराक, पेर्लीस, पुल्हा पिनांग, साबाहा, सारावाक, सेलांगूर आनी ट्रेंग्गानू हांचो आस्पाव जाता.

भूंयवर्णन :

मलेशियाचो चडसो भास दोंगरी आसा. दर्यादेगांनी आनी पर्वतांमजगतीं ल्हान ल्हान मळांचो आस्पाव जाता.

उदेंत मलेशियाची लांबाय सुमार 1,078 किमी. आसून ताची रुंदाय सुमार 258किमी. इतली आसा. ह्या विभागाक सुमार 2,253 किमी. लांबायेची दर्याचेग लाबिल्ली आसा. भूंयरचणुकेचे नदरेन ह्या विभागाचे मुखेलपणान तीन वांटे जातात. सारावाक हो शेकानशेक पातलिल्लो दर्यादेगेचो सपाट मळांचो भाग 32 ते 64 किमी. रुंदायेचो आसा. साबा भागांत मळांची रुंदाय 16-32किमी. आसा. उदेंत मलेशियाचो दुसरो भाग दोंगर- देगणांनी मोडटा. हांगाच्या कांय दोंगरांची उंचाय 305मीटर परस चड आसा. सारावाक भागांतले गूनुंग मुरूड (2,423 मी.) हें हांगाचे सगळ्यांत उंचेलें तेमक. विभागाच्या तिसऱ्या भागांत इंडोनेशियाच्या लागींच्या प्रदेशाचो आस्पाव जाता. हांगाच्या भागाची उंचाय हेर भागांपरस चड आसा. साबा भागांत हाचो विस्तार चड आसा. ह्या वाठारांत पठारां, दोंगरावळी आनी देगणांचो आस्पाव जाता. हांगा 1,219 ते 1,234 मी. मेरेन उंचायेचीं तेमकां आसात. किनाबालू (4,101 मी.) हें देशांतलें सगळ्यांत उंचेलें तेमक.

अस्तंत मेलेशिया हो विभाग सादारणपणान त्रिकोनी आकाराचो आसून ताची लांबाय सुमार 320 किमी. आनी रुंदाय 95किमी. आसा. हांगाच्यो दोंगरावळी उत्तर-दक्षिण दिकेन पातळिल्ल्यो आसात. तातूंतल्या कांय वळिंची उंचाय 1, 500मी. परस चड आसा. ह्या वळिंची उंचाय दक्षिणेकडे कमी कमी जायत वता. सेंट्रल रेंज (482 किमी.) ही हांगाची सगळ्यांत लांब दोंगरावळ आसा. वळीची सरासरी उंचाय 914 मी. आसा. गुनूंग ताहान (2, 190 मी.) हें ह्या भागांतलें सगळ्यांत उंचेलें