ब्लुमबर्ग हाच्या सोदाक लागून यकृतशोथ-बी हे विकृतीच्या निदानाखातीर खाशेली परिक्षा उपेगांत हाडली. हे परिक्षेक लागून रक्तदानांतल्यान उपरासपी वायरस-संसर्गाचो धोको टाळप शक्य जालें. लक्षण विरयत रोगवाहक वळखुपाखातीर ही परीक्षा गरजेची आसता.
यकृतशोथाक कारण आसपी वायरसाविशीं ब्लुमबर्ग हाणें केल्ल्या कार्याचें म्हत्व मतींत घेवन ताका आनी अमेरिकन बालरोगतज्ञ आनी वायरसशास्त्रज्ञ डॅनिएल कार्लटन गजडुसेक हांकां सांसर्गिक रोगांचो उगम आनी प्रसार हांचे मवे यंत्रणेविशींच्या सोदाखातीर १९७६ चो शरीरक्रियाविज्ञान आनी वैजकी विशयाचो नोबॅल पुरस्कार वांटून मेळ्ळो. ब्लिमबर्ग हाका आनिकूय जायते भोवमान फावो जाल्यात. १९७७ त ताचो Australia Antigen and the Biology of Hepatitis-B हो ग्रंथ उजवाडाक आयलो.
ब्लू पर्वत-१
अमेरिकेच्या संयुक्त संस्थानांतली दोंगरावळ. ही दोंगरावळ ऑरेगन राज्याच्या मध्यासावन ईशान्येक वॉशिंग्टन राज्यामेरेन पातळळ्या. हे दोंगरावळीची सरासरी उंचाय २००० मी. आसून ताची लांबाय ३१० किमी. आनी रुंदाय ११० किमी. आसा. रॉक क्रीक ब्यूट हें २,७७५मी. उंचायेचे हें दोंगरावळीतलें सगळ्यांत उंचेलें तेमूक. तशेच ऑल्ड्रिच, स्ट्रॉबॅरी, एल्कहॉर्न हीं तेमकां हें देंगरावळींत आसात. डेश्यूट, जॉनडे, ग्रँड राँड ह्यो कोलंबिया न्हंयेच्या उपन्हंयो ह्या वाठारांतल्यान व्हांवतात. तशेंच ह्या पर्वताचे देंवतेचेर डग्लस फर, पायन ही वनस्पत जाता. ह्या वाठारांतल्या उणे उंचायेच्या आनी दोंगराळ वाठारांत उदका शिंपणावळी वतीन शेती करतात. तेच भाशेन खणकाम, रान उत्पादन वेवसाय लेगीत चलतात. यूमाटिला, व्हिटमन, मलुर हीं हे दोंगरावळीच्या वाठारांतली पर्यटनाचे नदरेन म्हत्वाचीं थळां आसात.
ब्लू पर्वत-२
जामायकांतली ही दोगरांवळ किंग्स्टनाचे उतेत्तरेक सुमार १३किमी. चेर उदेंत-अस्तंत अशी पातळळ्या. हे दोंगरावळीची लांबाय ५० किमी. आसून सादारण उंचाय २१४ मी. ते १,२१९ मी. हांचेमदीं आसा. हे वळींत ब्लू मांउटन हें २,२५६ मी. उंचायेचें सगळ्यात व्हडलें तेमूक आसून पांच खिंडी आसात. दाट रानांनी व्यापिल्ले हे दोंगरावळींत, शियाळ्यांतलें तापमान ७ से. मेरेन देंवता. दोंगराच्या देंवतेच्या वाठारांनी काफयेची लागवड करतात. न्यूकॅसल आनी मँडिव्हिल ह्या सुवातांनी, सैमीक सोबीतकायेखातीर पर्यटकांची खूब गर्दी आसता.
ब्लू पर्वत-३
ऑस्ट्रेलियांतल्या ग्रेट डिवायडिंग रेंडच्या न्यू साऊथ वेल्सांतलो वालुकाश्म सड्याचो भाग ब्लू पर्वत वा ब्लू प्लॅटो ह्या नांवान वळखतात. हाचे उदेंतेकडल्या ३७० ते ५५० मी. उंचायेच्या तुटिल्ल्या कड्यासावन अस्तंतेकडल्या बर्ड रॉक ह्या सुळक्यामेरेन सुमार १,१३४ मी. मेरेन उंचाय वाडत वता. हे दोंगरावळींतली जनेलान गुहा आनी ग्रोस न्हंयेदेगणांतलें राश्ट्रीय उपवन उल्लेख करपासारकें आसा.
ह्या दोंगराचे उतार सुळ्याभशेन आसून ही दोंगराळ ग्रॅगरी ब्लॅक्सलँड ह्या समन्वेशकान १८१३ वर्सा पयली पार केली. हे दोंगरावळींत बांदील्ले रस्ते आनी रेल्वे-मार्गांक लागून हांगाचे दळण-वळण सोंपें जालां. सिडनी आनी लिथगोच्या रेल्वे मार्गांचेर खूबशीं शारां उदरगतीक पावल्यांत.
ब्लोएम्बरगेन निकेलास
(जल्मः ११ मार्च १९२०, डॉर्डरेख्ट - नॅदर्लंड्स)
अमेरिकन भौतिकशास्त्रज्ञ. ताणें उत्रेक्त विद्दपिठांतल्यान भौतिकशास्त्र विशयांत बी. ए. १९४१ आनी एम. ए. १९४३ त ताणें अमेरिकेंतल्या हार्वर्ड विद्दापिठांत इ. एम. पर्सेच हाचेवांगडा आपल्या प्रबंधाखातीर संशोधन केलें. १९४८ त ताणें लायडन विद्दापिठाची भौतिकशास्त्र विशयांतली पीएच. डी. पदवी मेळयली. त्याच वेळार ते त्या विद्दापिठांत संशोधक सहाय्यक आशिल्लो. १९४९-५१ ह्या काळांत तो हार्वर्डच्या सोसायटी ऑफ फेलोस हो संस्थेंत कनिश्ट अधिछात्र आशिल्लो. ते उपरांत हार्वर्ड विद्दापिठांत १९५१ त तो सहप्राध्यापक आनी १९५७ त अनुप्रयुक्त भौतिकशास्त्राचो गॉर्डन माके प्राध्यापक जालो. फुडें १९७४-८० ह्या काळांत ताणें भौतिकशास्त्राचो रम्फर्ड प्रध्यापक म्हणून त्याच विद्दाप्ठांत काम केलें. पॅरि, विद्दापीठ आनी कॅलिफॉर्निया विद्दापीठांत बर्कली अभ्यास प्राध्यापक म्हणून तशेंच लायडन विद्दापीठांत अभ्यागत लोरेण्टस प्राध्यापक आनी बंगलोर विद्दापिठांत अब्यागत रामन प्राध्यापक १९७९ म्हणून काम केलें.
नीच तापमानाक जावपी स्फटिकांतल्या चुंबकीय अनुस्पंदनाचो अभ्यास करीत आसतना ब्लोएम्बरगेन हाका मेसराखातीर वापरपाक फावो अशी त्रिस्तरीय आनी भौस्तरीय पंपींग पद्दतीची कल्पना येवजली. १९५७ त ब्लोएम्बरगेन आनी ताचे वांगडी हांणी २१ सेंमी. तरंग लांबायेचें प्रारण (radiation) उत्सर्जित करपी मेसर तयार केलो. हाचे उपरांत कितल्याशाच शास्त्रज्ञांनी वेगवेगळी तरंग लांबी आशिल्ले मेसर सोदून काडून ब्लोएम्बरगेन हाणें दिल्ले सैध्दांतिक विस्कटावणेची अचूकताय सिध्द केली.
ब्लोएम्बरगेन आनी ताचे वागंडी हांणी प्रयोगावरवीं अशें दाखयलें,
