मळाचेरय यांत्रिक अभियंत्यांनी म्हत्वाचें काम केलां.ह्या काळांतले तंत्रविद्येक आनीक एक म्हत्वाचें यश फाव जालें तें म्हळ्यार अणुकेंद्रीय विक्रियकांची उबारणी आनी तांच्या अणुकेंद्रीय भंजनाकलागून निर्माण जावपी उश्णतेचो वीज उत्पादनाखातीर केल्लो उपेग हें जावन आसा.अशे तरेचीं संयंत्रां ब्रिटन,अमेरिका सारकिल्ल्या देशांनी बंदल्यांत. अशें पयलें संयंत्र इंग्लंडांत कॉल्डर हॉल हा6गा १९५७त तयार जालें.१९६० मेरेन हे प्द्दतीचो प्रसार जावन जर्मनी, रशिया,फ्रान्स, इटली, जपान,भारत ह्या देशांनीय अशीं संयंत्रां उबारणा सुरवात जाली.अमेरिकेंत तर अणुशक्तीचेर चलपी पाणबुड्योय बांदल्यात.
वैजकी मळारय आयज जायते नवे नवे सोद लागल्यात. नवीं नवीं वखदां आनी यंत्रांच्या सोदाक लागून व्हड व्हड दुयेसांलेगीत बरीं जावपाक लागल्यांत.
परिणाम: तंत्रविद्येन मनशाच्यो गरजो भागोवपाखातीर खूब सुविधा निर्माण क्व्ल्यो. ह्या सुविधांवरवीं मनशाक आपली सर्वांगी उदरगत साधून घेतली. फातरापसून सुरवात करून तंत्रविद्येन मनशाच्या हातांत इलेक्ट्रॉनीक हाडून दिलो. झाडाच्या पानांच्या खोपीचो आलाशिरो घेवपी मनशाक पंचतारांकीत राबित्याची सोय करून दिली.मनात येता तें भोगपाचो तंत्रविद्येन मनशाक वर दिलो.
तंत्रविद्या जशी जशी विकसीत जायत गेली तशी तशी तिची गरज म्हणून आनी परिणाम म्हणून मनशाच्या वेव्हारांत क्रांतीकारी बदल जालो.तंत्रविद्येन मनशाच्या हातांत वेगवेगळ्या तरेच्यो शक्ति दिल्यो. ह्या शक्तींचो विधायक कामाखातीर उपेग जातनाच विध्वंसक कामाखातीर उपेग करप जालो.अणुशक्तीचो अणुबॉंबाखातीर उपेग करून संवसारांत दोन म्हाझुजां घडलीं.आयचे घडयेक ब-याच राष्ट्रांकडेन जीं संहारत्मक अस्त्रां आसात तीं तंत्रविद्येची देणगी आसा.
लोकसंख्येची वाड करपाक तशेंच तिचें नियंत्रण करपाक तंत्रविद्येन हातभार लायला.वैजकी मळार जाल्लो विकास, अन्न धान्याच्या बाबतींत जाल्ली सुदारणा, हुंवार, भूंयकांप, रोगराई आनी हेर सैमीक अवर्शणाचें केल्लें नियंत्रण, हाका लगून मरण प्रमाण उणें जावन लोक संख्येंत भर पडत आसा. हेच तंत्रविद्येच्या आदारान दुसरेवटेन कुटुंब नियोजन जाता आशिल्ल्यान लोकसंख्येचेर नियंत्रण पडटा.
शारीकरण ही एक तंत्रविद्येची उपनिर्मिती, जंय तंत्रिकरणाचो वेग वाडला.शारिकरणातल्यान समाजीक मांडावळीक बादा हाडल्या. समाजीक रचणूक आनी समाजीक संबंद हातूंत बरे तशे वायट बदल घडोवन हाडल्यात.
तांत्रिक कारणान पर्यावरणांत बादा हाडून समाजांत स्वास्थ्याचो प्रश्र निर्माण केला.तंत्रविद्येवरवीं व्हड व्हड सोद लावन मनशाखातीर केल्ल्या सुविधांचो लाव घेवपाखातीर जें एक समाजीक,मानसीक आनी पर्यावरणीय स्वास्थ्य लागता तेंच तांत्रिकरणांतल्यान नश्ट जाल्ल्यान तंत्रविद्या हो वर काय श्राप हाचेर सद्या बुदवंतांची भासाभास चालू आसा. -कों.वि.सं.मं.
पूरक नोंद: तांत्रिक शिक्षण
:ताम्रपाशाणयुग
तंत्रशास्त्र: अध्यात्म गिन्यानाचो वा तत्वगिन्यानाचो विस्तार करपी शास्त्र. तत्व आनी मंत्र हांणी युक्त अशा व्यापक अर्थांचो विस्तार करपी आनी साधकांचें, साधनेचे वरवीं परित्राण करपी जें शास्त्र आसा,ताका तंत्र अशें म्हण्टात.देवतेच्या रूप – गुण – कर्माचें चिंतून-मनन,देवताविशींच्या मंत्रांचो उपदेश, मंत्रांची संयोजना हांची जातूंत म्हायती आसता,ताका तंत्र अशें म्हण्टात.व्यापक अर्थान सांगपाचें जाल्यार शास्त्र, सिध्दांत, अनुष्ठान, विज्ञान ह्यो गजाली जातूंत सांगल्यात, ताका तंत्र अशें म्हण्टात. तंत्राक आगम अशें दुसरें नांव आसा.
तंत्रशास्त्रांत तंत्रांचें फुडले तीन विभाग सांगल्यात. (१)आगम: सृश्ट, प्रलय,देवतापुजा,पुरश्वरण,षटकर्मसाधन आनी चतुर्विध ध्यानयोग हांचें वर्णन आशिल्ल्या ग्रंथांक आगम अशें म्हण्टात.
(२)यामल: सृश्टीतत्व, ज्योतिश,नित्यकृत्य, क्रम,सूत्र,वर्ण्भेद आनी युगधर्म हांचो विचार जातूंत केला,त्या ग्रंथांक यामल अशें म्हण्टात.
(३)तंत्र: सृश्ट, लय,मंत्र- यंत्रनिर्णय,तीर्थ,आश्रमधर्म, कल्प,ज्योतिश, व्रत, शौचाशौच, दादल्या – बायलांचें लक्षण, राज- दान-युगधर्म, वेव्हार,अध्यात्म,स्नानविधी,भू-भूतशुध्दी, प्राणायाम, न्यास,जप,तर्पण, पुजा, दीक्षा,अभिशेक,प्रायश्वित,चक्रपुजा,मुद्रा ह्या –जालींचें वर्णन ज्या ग्रंथांत आसा,तांकां तंत्र अशें म्हण्टात.
क्रिया हें तंत्रांचें खाशेलपण. वेदीक ग्रंथांत सांगिल्ल्या ज्ञानाचें क्रियाल्मक रूप प्रगट करप, हो तंत्रांचो हेत.वेगवेगळ्या साधनांवरवीं देवता आनी सैमीक शक्ति हांकां होरावप,योगावरवीं भितल्ल्या शिवशक्तींचें मिलन घडोवन हाडप आनी मनशाच्या जिवात्म्याचेर वेगवेहळे संस्कार करून ताका दिव्यभावाचे अवस्थेंत व्हरून अद्वैतरूप आत्मज्ञानाचो साक्षात्कार घडोवप, हो तंत्रांचो हेत.
वैदीक काळांत यज्ञयागां वांगडा तंत्रीक पद्दतीय प्रचारांत आशिल्ल्यो, अशें म्हण्टात.छांदोग्यांतली मधुविद्या ही तंत्रीक रहस्यात्मकूच आसा.
